Densaýlyq saqtaý ministri Eljan Birtanov 24 aqpanda Japoniiadan Nur - Sultanǵa ushyp kelgen jolaýshylardan keshirim surady. Bul jóninde ol búgin Úkimet otyrysynan shyqqan soń jýrnalister suraǵyna jaýabynda aitty.
Birtanovtyń sózinshe, SCAT kompaniiasynyń Tokiodan Nur-Sultanǵa ushatyn ushaǵynda Diamond Princess lainerinde karantinde bolǵan tórt jolaýshy baryn ministrlik basqa jolaýshylarǵa "eskertip úlgermegen".
- Ushaqta bolǵan ózge jolaýshylardan keshirim suraimyz. Jolaýshylardy ushaqqa otyrǵyzý týraly sheshim qabyldanǵanda, eskertýge ýaqyt bolmady,- dedi ol.
Birtanov Japoniia jaǵalaýynda karantinde turǵan Diamond Princess lainerinde bolǵan Qazaqstannyń tórt azamatynyń qolynda "densaýlyǵy jaqsy" degen meditsinalyq anyqtamasy bolǵanyn, sondyqtan Japoniia taraby olardyń ushaqqa otyrýyna kedergi jasamaǵanyn aitty.
"Tórt adamǵa taǵy úsh túrli test jasalady. Bul jaily qosymsha málimet beremiz" dedi ministr.
24 aqpan túnde Japoniiadan Nur-Sultanǵa kelgen áýe reisinde 20 adam bolǵan. Tórteýi Diamond Princess lainerinde bolǵandar, 8-i ekipaj múshesi, 8-i ózge jolaýshy. Ministrdiń sózinshe, barlyǵy karantinge jatqyzylǵan.
20 qańtarda Japoniianyń Iokogama portynan teńizge saiahatqa shyǵyp, aqpannyń basynda koronavirýsqa bailanysty portqa oralǵan, 3700 jolaýshysy bar Diamond Princess kemesi aqpannyń 19-yna deiin karantinde turǵan. Kemede 350-den astam adamnyń koronovirýs juqtyrǵany anyqtalǵan.
