Aqtóbede bir jasar sábi anasynyń salǵyrttyǵynan soqyr bolyp qaldy, dep habarlaidy AstanaTV.
Balasynyń taǵdyryna bei-jai qaraǵan 29 jastaǵy kelinshek analyq quqyǵynan aiyryldy. Al, zaǵip búldirshin bóbekter úiine berilgen. Úlken úsh balasy kámeletke tolmaǵandarǵa arnalǵan beiimdeý ortalyǵynda turyp jatyr.
Politseilerdiń sózinshe, únemi spirtti ishimdik ishýden aýzy bosamaityn anasy bala tárbiesimen ainalyspaǵan. "Sábiiniń densaýlyǵyna zaqym keltirdi" degen kúdikke ilingen áielge qatysty qylmystyq is te qozǵalǵan. Mas kúiinde balanyń kózine dári emes, basqa bir suiyqtyqty quiyp jibergen bolýy múmkin degen boljam jasalypty. Degenmen, saraptama nátijesi sábidiń kózi aýrýdyń asqynýy saldarynan kórmei qalǵanyn kórsetken.
"Bul derekke qatysty saraptama taǵaiyndaldy. Saraptama nátijesi boiynsha balanyń kózi kórmeýine áieldiń qatysy joǵy anyqtaldy. Qazirgi tańda qylmystyq is toqtatyldy. Qazir bir jastaǵy Aleksandr sábiler úiiniń qamqorlyǵynda", — dedi oblystyq IID baspasóz qyzmetiniń jetekshisi Erbolat Sarqulov.
Alaida, kóz janary endi emdeýge kelmeidi eken. Sondyqtan múgedektigin rásimdeý úshin qujat daiyndalyp jatyr.
Áieldiń 5 pen 8 jas aralyǵyndaǵy úlken úsh balasy qazir kámelet jasyna tolmaǵandarǵa arnalǵan beiimdeý ortalyǵynda. Olarmen psihologtar men logopedtter jumys isteýde. Endi bir aida soń balalar úiine jiberiledi.
