Astanadaǵy №1 qalalyq balalar aýrýhanasynda em qabyldaǵan bir jasar búldirshinge týberkýlez diagnozy qoiyldy. Balanyń ata-anasy infektsiianyń aýrýhanada jumys istegen meiirgerden juqqanyn aityp, oqiǵaǵa qatysty jaýaptylardy jaýapqa tartýdy talap etip otyr, dep habarlaidy ult.kz.
Balanyń ákesiniń aitýynsha, biyl sáýir aiynda 1 jas 1 ailyq uly aýyr pnevmoniiamen aýrýhanaǵa túsip, bes kún em qabyldaǵan. Jaǵdaiy jaqsarǵan soń dárigerler ony úiine shyǵarǵan.
Arada biraz ýaqyt ótkende osy aýrýhanada qyzmet atqarǵan meiirgerdiń týberkýlezge shaldyqqany belgili bolǵan. Osyǵan bailanysty meditsina mekemesi buryn emdelgen balalardy qosymsha tekserýge shaqyrǵan.
Tekserý barysynda búldirshinniń mantý jáne diaskintest synamalary oń nátije kórsetken. Keiin kompiýterlik tomografiiadan ókpesinde ózgeris baiqalǵan. Alǵashynda dárigerler muny burynǵy pnevmoniianyń saldary bolýy múmkin dep boljap, eki apta boiy antibiotikpen em júrgizgen.
Alaida qaita jasalǵan KT qorytyndysy boiynsha balaǵa «sol jaq ókpeniń joǵarǵy bóliginiń birinshilik týberkýlezi» diagnozy qoiylǵan. Qazirgi tańda ol týberkýlezge qarsy dispanserge jatqyzylyp, arnaiy em qabyldamaq.
Balanyń ákesi komissiia bastapqyda meditsinalyq qorytyndyny berýden bas tartqanyn aitady. Onyń sózinshe, mamandar «anasy 12 jyl buryn týberkýlezben aýyrǵan, balaǵa infektsiia sodan juqqan bolýy múmkin» degen boljam aitqan. Tek bul másele buqaralyq aqparat quraldarynda jariialanatyny eskertilgennen keiin ǵana otbasyǵa resmi qorytyndy berilgen.
Qazir otbasy zańgerlerdiń kómegine júginip, oqiǵaǵa qatysty quqyqtyq sharalardy qolǵa alǵan. Al Astana qalasynyń Densaýlyq saqtaý basqarmasy atalǵan jaǵdai boiynsha qyzmettik tekserý bastalǵanyn málimdedi.
