Almatyda turǵyndardy turǵylyqty jeri boiynsha tirkeý, aqyly turaq, kólikterdi arnaiy turaqqa evakýatsiialaý jáne Shymbulaq aýmaǵyna kólikpen kirýge qatysty jańa erejeler bekitildi, dep habarlaidy ult.kz.
Sheshimderdi qalalyq máslihat depýtattary kezekten tys 52-sessiia barysynda qabyldady.
Tirkeýge qatysty talap ózgerdi
Endi turǵylyqty jeri nemese ýaqytsha turatyn jeri boiynsha tirkelý kezinde bir adamǵa turǵyn úidiń keminde 15 sharshy metri tiesili bolýy kerek.
Máslihatta bul talap bir mekenjaiǵa kóp adamnyń jalǵan tirkelýine jol bermeý úshin engizilgenin túsindirdi.
Alaida shekteý turǵyn úi iesi óziniń otbasy múshelerin nemese jaqyn týystaryn tirkegen jaǵdaida qoldanylmaidy.
Shymbulaqqa kólikpen kirýge shekteý qoiylady
Shymbulaq aýdanyndaǵy erekshe qorǵalatyn tabiǵi aýmaqqa kólikpen kirý tártibi de ózgeredi.
Qalalyq bilik bul sheshimdi kólik qozǵalysynyń kúrt artýymen túsindirdi. 2026 jyldyń alǵashqy segiz aiynda atalǵan aýmaqta 179 024 kólik ótýi tirkelgen. Al 2022 jyldyń búkil jylynda bul kórsetkish 76 606 bolǵan. Qazir baqylaý-ótkizý beketi arqyly táýligine orta eseppen 700 kólik ótedi.
Ishten janý qozǵaltqyshy bar kólikterdiń kirýine shekteý qoiylady. Elektromobilderge jumys kúnderi kirýge ruqsat etiledi, al demalys jáne mereke kúnderi olarǵa da shekteý qoldanylady.
Bul talaptan jergilikti turǵyndar, uiymdar, jedel, kommýnaldyq jáne arnaiy qyzmet kólikteri bosatylady.
Almatyda aqyly turaq qymbattaýy múmkin
Kommýnaldyq aqyly turaqtardyń tarifi de ózgeredi. Almatyda 2016 jyldan beri saǵatyna 100 teńge mólsherinde biryńǵai tarif qoldanylyp kelgen.
Endi baǵa aýmaqtyń kólik júktemesine qarai belgilenedi:
- 100 teńge – júktemesi tómen aýmaqtarda;
- 150 teńge – ortasha júktemeli aýmaqtarda;
- 200 teńge – suranysy joǵary ýchaskelerde.
Qala biliginiń málimetinshe, sońǵy on jylda Almatydaǵy kólik sany 1 millionnan asqan. Saralanǵan tarifter turaq oryndarynyń ainalymyn arttyryp, bos oryn izdeýge ketetin ýaqytty qysqartýǵa baǵyttalǵan.
Kólikti evakýatsiialaý aqyly bolady
Almatyda alǵash ret ustalǵan kólikterdi kommýnaldyq arnaiy turaqtarǵa jetkizý jáne saqtaý úshin aqy belgilendi.
Kólikti arnaiy turaqqa jetkizý quny 3 AEK – 12 975 teńge bolady. Bul soma kólik sanatyna qaramastan birdei.
Jeńil kólikti arnaiy turaqta saqtaýdyń alǵashqy táýligi 2,5 AEK – 10 812 teńge, al keiingi ár táýlikke 5 AEK – 21 625 teńge alynady.
Eger kólik iesi evakýatsiia bolǵan kúni saǵat 18:00-ge deiin kóligin alyp ketse, saqtaý aqysy alynbaidy.
Jańa tarifter kez kelgen evakýatsiiaǵa qatysty emes. Olar ákimshilik quqyq buzýshylyq týraly zańnamada kózdelgen jaǵdailarda ustalyp, arnaiy turaqqa jetkizilgen kólikterge ǵana qoldanylady.
Qalalyq biliktiń málimetinshe, qazir evakýatorlardy ustaýǵa biýdjetten jyl saiyn shamamen 862 million teńge, al arnaiy turaqtarǵa 113 million teńgeden astam qarjy jumsalady. Jalpy shyǵyn 974 million teńgeden asady. Jańa tólem júiesi bul shyǵyndardy ózin-ózi aqtaityn deńgeige jetkizýge baǵyttalǵan.
Sonymen qatar máslihat Almaty máslihaty apparatynyń erejesin qoldanystaǵy zańnamaǵa sáikestendirý týraly sheshim qabyldady.
