AQSh-tyń Sent-Lýis qalasynda bas súiegi tutasyp týǵan eki jasar egiz qyz Hiiab pen Výhbto sátti ajyratyldy. Operatsiia men oǵan deiingi daiyndyq jáne keiingi alǵashqy qalpyna keltirý jumystary bir táýlikten astam ýaqytqa sozylǵan, dep habarlaidy ult.kz.
Hiiab pen Výhbto – bas súiegi tutasyp týǵan egizder, iaǵni kraniopagtar. Mundai jaǵdai óte sirek kezdesedi. AQSh Ulttyq meditsina kitaphanasynyń derekterine súiengen aýrýhana málimetinshe, kraniopagtar shamamen ár 2,5 million tiri týǵan balanyń birinde kezdesedi. Olar barlyq bitisken egizderdiń 6 paiyzynan azyn quraidy.
Qyzdar Efiopiiada dúniege kelgen. 2025 jyldyń naýryzynda, alǵashqy týǵan kúnderine az ýaqyt qalǵanda, olar emdelý úshin AQSh-tyń Sent-Lýis qalasyna jetkizilgen.
Operatsiiaǵa neirohirýrgter, plastikalyq hirýrgter, anesteziologtar jáne basqa da meditsina mamandary qatysty. Barlyǵy 60-tan astam maman qyzdardyń emine atsalysqan.
Dárigerlerdiń aitýynsha, mundai operatsiia kezinde bas aimaǵyndaǵy mańyzdy qan tamyrlary men tinderdi zaqymdamai, eki balanyń da ómirin saqtap qalý qajet. Sondyqtan ota asa dáldikti jáne birneshe meditsinalyq toptyń úilesimdi jumysyn talap etedi.
Operatsiia 24-25 aqpanda jasalǵan. Birneshe aptadan keiin egizder eki jasqa tolǵan týǵan kúnderin endi eki bólek bala retinde qarsy alǵan.
Alaida ajyratý operatsiiasy emniń sońǵy kezeńi bolǵan joq. Qyzdarǵa uzaq ońaltý jáne qosymsha hirýrgiialyq em qajet.
Qazir olar Ranken Jordan Pediatric Bridge Hospital mamandarynyń baqylaýynda. Dárigerler qyzdardyń ózdiginen otyrýyn, turýyn, júrýin, tamaqtanýyn, sóileýin jáne oinaýyn úirenýine kómektesip jatyr.
«Endi olar jeke terapiiaǵa qatysyp, buryn jabysyp turǵandyqtan jasai almaǵan kúndelikti áreketterdi úirene alady», – dedi aýrýhana ókili Nik Holekamp.
Qyzdardyń ekeýi de áli dárigerlerdiń baqylaýynda. Výhbtoǵa bas súiegindegi aqaýdy qalpyna keltirý boiynsha kranioplastika operatsiiasy jasalǵan. Al Hiiab mundai otany kúzde ótkerýi tiis.
Mamandardyń aitýynsha, alda áli uzaq ońaltý kezeńi bar. Degenmen qazir qyzdar bólek tósekte jatyp, jeke em qabyldap, bir-birinen táýelsiz qozǵalys jasaýǵa birtindep úirenip jatyr.
