Kókshetaý qalalyq soty ákimshiliginiń 27 jastaǵy basshysy Aian Dúisekov qaitys boldy. Politsiia bul fakti boiynsha sotqa deiingi tergeý bastaǵan, dep habarlaidy ult.kz Qumash.kz portalyna silteme jasap.
Marqumnyń týystary sońǵy ailarda Aianǵa jumys ornynda moraldyq jáne psihologiialyq qysym kórsetilýi múmkin ekenin aityp otyr. Olardyń sózinshe, oǵan ádiletsiz tártiptik jaza qoldanylǵan.
Budan keiin qyzmettik páter máselesi kóterilgen. Týystarynyń aitýynsha, Aian jubaiy jáne eki balasymen – bir jáne úsh jastaǵy balalarymen birge turǵan. Qyzmettik baspana oǵan birneshe ai buryn berilgen.
Aian bolashaqta sýdia bolýdy josparlaǵan. Týystary onyń jumystaǵy jaǵdaiyna qatysty barlyq mán-jaidy tekserýdi surap otyr.
Sonymen qatar otbasy qyzmetkerler tarapynan qysym bolǵan-bolmaǵanyn, sondai-aq Dúisekov qaitys bolǵannan keiin keibir qyzmetkerlerdiń eńbekke jaramsyzdyq paraǵyn alǵany týraly aqparatty tekserýdi ótindi.
Politsiia atalǵan jaǵdai boiynsha sotqa deiingi tergeý bastalǵanyn habarlady. Tergeý barysynda oqiǵanyń barlyq mán-jaiyna quqyqtyq baǵa berilmek.
