Kókshetaý qalalyq soty ákimshiliginiń 27 jastaǵy basshysy qaitys boldy. Áleýmettik jelilerde onyń óz-ózine qol jumsaǵany jáne jumysta qysym kórgeni týraly aqparat taraǵan, dep habarlaidy ult.kz.
Marqumnyń týystary oǵan negizsiz tártiptik jaza berilgenin jáne qyzmettik páterden shyǵarý máselesi bolǵanyn aitqan.
Aqmola oblysynyń Politsiia departamenti oqiǵaǵa qatysty tergeý júrip jatqanyn málimdedi.
«Qajetti tergeý áreketteri júrgizilip, oqiǵanyń barlyq mán-jaiy anyqtalyp jatyr. Ózge aqparat tergeý múddesine bailanysty jariia etýge jatpaidy», – dedi politsiia.
Al Aqmola oblysy boiynsha Sot ákimshiligi departamenti qyzmetkerge jumys barysynda qysym kórsetilmegenin málimdedi. Vedomstvo 13 tamyzdaǵy sógis eńbek tártibin buzǵany úshin berilgenin jáne onyń zańdylyǵyn Memlekettik qyzmet isteri agenttiginiń aýmaqtyq organy teksergenin aitty.
Departament qyzmetkerdi qyzmettik turǵyn úiden shyǵarý máselesi kóterilmegenin de atap ótti.
Vedomstvo oqiǵanyń naqty sebepteri tergeý nátijesinde anyqtalatynyn habarlady.
