Úkimet úiinde QR Premer-Ministriniń orynbasary Berdibek Saparbaev ministrlikterdiń basshylarymen jáne oblystar ákimdikteriniń qatysýymen áleýmettik salada memlekettik-jekeshelik áriptestik jobalaryn iske asyrý boiynsha keńes ótkizdi, dep habarlaidy "Ult aqparat" primeminister.kz saityna silteme jasap.
Vitse-premer ekonomika men salany damytý úshin tek biýdjettik investitsiialardy tartyp qoimai, jeke investitsiialardy jumyldyrý qajet bolǵandyqtan el basshylyǵy memlekettik-jekeshelik áriptestikti damytýǵa erekshe kóńil bólip otyrǵanyn atap ótti.
«2016-2019 jyldary ákimdikter jalpy somasy 61 mlrd teńgege MJÁ jobalaryn iske asyrýǵa 140 shart jasasty. Shyǵys Qazaqstan oblysy jáne Almaty qalasynda birde-bir shart jasalmaǵan. Soltústik Qazaqstan oblysynda, Mańǵystaý oblysynda bir-bir jobadan qol qoiyldy», — dedi ol.
B.Saparbaev onkologiialyq jáne qan ainalym júiesi aýrýlary qyzmetteriniń meditsinalyq jabdyqtaryn MJÁ boiynsha satyp alýda óńirler artta qalyp qoiǵanyn aitty.
«Prezident Q. Toqaev Úkimettiń keńeitilgen otyrysynda densaýlyq saqtaý men bilim berý salasynda MJÁ-ni iske asyrý nashar júrgizilip jatqanyn atap ótken bolatyn. Bilim jáne ǵylym ministrliginiń MJÁ máseleleri boiynsha naqty túsinigi, paiymy joq, júieli jumys jolǵa qoiylmaǵan. Qazaqstandyq MJÁ ortalyǵy men BǴM jobalary boiynsha derekterdiń eleýli aiyrmashylyǵy bar», — dedi ol.
Sonymen, vitse-premerdiń aitýy boiynsha keibir óńirler MJÁ-niń kishi túrleri boiynsha belgilengen talaptarǵa sáikes kelmeitin jobalardy beredi. Atyraý, Jambyl jáne Batys Qazaqstan oblystarynda bilim berý júiesine investorlardyń qarajaty tartylmaǵan. Aqtóbe, Almaty, Qostanai, Soltústik Qazaqstan, Qyzylorda oblystary men Nur-Sultan qalasynda Bes áleýmettik bastamanyń sheńberinde jataqhanalardyń qurylysy sozylýda.
Aǵymdaǵy jaǵdai men qabyldanyp jatqan sharalar týraly densaýlyq saqtaý vitse-ministri Kamaljan Nadyrov, bilim jáne ǵylym vitse-ministri Bibigúl Asylova, ulttyq ekonomika vitse-ministri Jasulan Mádiev, Shyǵys Qazaqstan, Aqtóbe oblystary men Shymkent qalasy ákimderiniń orynbasarlary baiandap berdi.
Keńesti qorytyndylai otyryp, Berdibek Saparbaev birqatar naqty tapsyrmalar berdi. Atap aitqanda, densaýlyq saqtaý, bilim jáne ǵylym ministrlikterine Ulttyq ekonomika ministrligimen, ákimdiktermen birlesip, olardyń naqty tizbesimen jáne ai saiynǵy iske asyrý merzimderimen MJÁ-niń josparlanyp otyrǵan jobalarynyń kestesin qalyptastyrýdy, onlain rejimde baqylaýdy tapsyrdy.
«Búgin ministrlikter ásirese, jergilikti jerde iske asyrylatyn MJÁ jobalarynyń biýdjettik tiimdiligin taldamaidy. Biz «sannan - sapaǵa« ótýimiz kerek. Memleket óz betinshe paida taba alatyn jobalardy basymdyq etýi tiis», — dep naqtylady B. Saparbaev.
Sonymen birge qarajatty paidalaný jáne qurylystardyń úlgilik jobalaryn paidalaný tiimdiligine basa nazar aýdardy.
Odan basqa, keńeste áleýmettik saladaǵy obektilerdi jekeshelendirý, olardy senimgerlik basqarýǵa berý jáne baiqaý keńesterin qurý máseleleri qaraldy.
