Bilim ministrligi mekteptegi kanikýldyń uzaqtyǵy ózgerissiz qalǵanyn málimdedi, - dep habarlaidy Tengrinews.kz tilshisi.
Eske salaiyq, buǵan deiin biznesmen jáne Bi Group qurylys holdinginiń negizin qalaýshy Aidyn Rahymbaev Qazaqstanda mekteptegi kanikýldyń uzaqtyǵyn tórt aptaǵa qysqartýdy jáne sol arqyly oqý jylynyń uzaqtyǵyn 38 aptaǵa deiin ulǵaitýdy usynǵan bolatyn. Onyń aitýynsha, oqý jylynyń uzaqtyǵy Aziianyń aldyńǵy qatarly elderine qaraǵanda qysqa, bul bilim berýdiń tiimdiligine áser etedi. Sondai-aq kásipker kompaniianyń turǵyn úi kesheni janynan ashylyp jatqan BINOM orta mektepterinde biyl Bilim ministrliginiń ruqsatymen oqý jylynyń uzartylatynyn da atap ótken bolatyn.
Bilim ministrligi Tengrinews.kz saitynyń saýalyna bergen jaýabynda elimizde oqý jyly 1 qyrkúiekte bastalyp, 25 mamyrda aiaqtalatynyn jáne bul ózgerissiz qalatynyn habarlady.
"Buǵan deiin 2021 jylǵy tamyz keńesiniń qorytyndysy boiynsha ministrlik Y.Altynsarin atyndaǵy Ulttyq Bilim akademiiasyna bilim alýshylardyń júktemesin azaitýǵa, oqý jylynyń ońtaily uzaqtyǵyn anyqtaýǵa, bilim berý uiymdarynda eńbekke aqy tóleýdiń saǵattyq jalaqy júiesiniń artyqshylyqtaryna jáne úlgilik oqý baǵdarlamalaryn jańartýǵa qatysty birqatar zertteýler júrgizýdi tapsyrdy", - dep habarlady BǴM vitse-ministri Sholpan Karinova.
Vitse-ministrdiń aitýynsha, mundai sheshim qabyldaý jáne kanikýldardy qysqartý, oqý jylyn uzartý boiynsha pilottyq jobany júrgizý úshin biylǵy oqý jylyn aiaqtaý qajet. Menshik nysanyna qaramastan, barlyq bilim berý uiymdary memlekettik jalpyǵa mindetti standartty saqtaýǵa mindetti.
Sondai-aq, ministrlik jańa jobalardy engizý kezinde dáleldemeler men aldyn ala talqylaý arqyly rastalǵan ǵylymi kózqaras mańyzdy dep sanaidy.
