«Berlin-Minsk-Almaty» charterlik reisiniń 12 jolaýshysynyń jeteýinen koronavirýs tabyldy. Olardyń arasynda bortserik áiel de bar, dep habarlaidy QazAqparat.
Bul týraly búgin onlain brifing barysynda qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaqasymova aitty.
Onyń aitýynsha, bort 13 naýryzda ushyp kelgen.
«Bul bort kelisimen biz infektsiialyq statsionarǵa oqshaýladyq. Bortta bolǵan 12 adamnyń barlyǵy: 9 jolaýshy men 3 ekipaj múshesi jeke boksqa jatqyzyldy. 12 adamnyń jeteýinen koronavirýs tabyldy. Onyń ishinde bortserik áiel bar. Olar qoǵamǵa qaýip tóndirmeidi. Sebebi, aýrý oshaǵy der kezinde zalalsyzdandyrylyp úlgerdi», - dedi A.Moldaqasymova.
Aita ketý kerek, qazir Qazaqstanda 79 koronavirýs juqtyrý jaǵdaiy tirkelgen.
Nur-Sultan qalasynda – 41 adam, Almatyda – 31 adam, Qaraǵandyda - 2, Almaty oblysynda - 1, Aqtóbe oblysynda – 1, Shymkentte - 1, Jambyl oblysynda - 1, Soltústik Qazaqstan oblysynda - 1 adam aýrý juqtyrǵan.
