Foto: instagram.com/ruslan_berdenov
Qazir Shymker qalasynda qala ákiminiń orynbasary Rýslan Berdenovke jasalǵan qastandyq oqiǵasyna qatysty sot otyrysy ótip jatyr. Ult.kz tilshisi oqiǵa oryn alǵan kezden bastap sot otyrystary qalai ótkenine sholý jasady.
Qylmystyq oqiǵa
2025 jyly 21 sáýirde Shymkent qalalyq ákimdigi ǵimaratynyń janynda Rýslan Berdenovke qastandyq jasaldy. Oǵan 5 ret oq atylyp, aýyr halde aýrýhanaǵa tústi. Sheneýnikke shuǵyl ota jasalyp, aman qaldy.
Berdenovke oq atqan 31 jastaǵy Ernar Jiembai esimdi azamat oqiǵa ornynan kóp uzamai birden ustalǵan. Oǵan Qylmystyq kodekstiń 24-baby 3-bóligi (Qylmysqa daiyndalý jáne qylmysqa oqtalý), 99-bap 1-bóligi (Kisi óltirýge oqtalý) boiynsha aiyp taǵylyp, tergeý bastaldy.
Oqi otyryńyz: «Memleketke baǵyttalǵan eskertý»: Májilismender Berdenovtiń jaǵdaiyna qatysty pikir bildirdi
Aldyn ala tyńdaý
22 shilde kúni aldyn ala tyńdaý merzimi jarialanyp, 28 shildede Shymkenttiń qylmystyq ister jónindegi mamandandyrylǵan aýdanaralyq sotynda aldyn ala tyńdaý ótti.
Oqi otyryńyz: Shymkentte Rýslan Berdenovke jasalǵan qastandyq isi boiynsha sot protsesi bastaldy
Onda aiyptalýshy Ernar Jiembai qylmystyq isti alqabilerdiń qatysýynsyz qaraýdy ótingen, ózin foto-videoǵa túsirýge qarsy boldy, ótinish qanaǵattandyryldy.
Zakon.kz jazýynsha prokýror Erlan Sádibekov baiandaǵan málimetke sáikes Jiembai Shymkent qalasy ákimdiginiń qurylys nysandaryna monitoring júrgizý basqarmasynyń bólim basshysy K.-nan uialy telefon arqyly Shymkent qalasy ákiminiń orynbasary Berdenovtiń "Turǵyn úi Shymkent" JShS direktory laýazymynan óz erkimen aryz jazyp ketsin degeni týraly aitqanyn estip, adam óltirý iaǵni, adam quqyǵyna qarsy qasaqana qazaǵa ushyratý qylmystyq oiy paida bolǵan.
Prokýrordyń aitýynsha, aiyptalýshy áýeli ishimdik ishken. Sosyn úiinen ańshy myltyǵyn alyp, eshkimge bildirmei qylmystyq oiyn júzege asyrý amalyna kirisken.
Aldyn ala tyńdaý jábirlenýshiniń densaýlyǵyna bailanysty onyń óziniń qatysýynsyz ótken, alaida sýdia Berdenovti negizgi sot otyrysyna mindetti túrde ózi kelýin mindettedi.
Negizgi sot otyrysynyń bastalýy
Negizgi sot otyrysy 6 tamyzda bastalǵan. Rýslan Berdenov sýdianyń mindetteýine qaramastan densaýlyǵyna bailanysty sotqa qatyspady.
Al aiyptalýshy Ernar Jiembai sheneýnikke ne úshin oq atqanyn aitty. Ol mundai qylmysqa jumystan shyǵarylǵany úshin emes, áielin qyzǵanǵannan barǵanyn aitty. Namysy taptaldy dep eseptegen Jiembai óz sózinde Berdenov áieline "sen ádemisiń" dep jazyp, sýretine laik qoiǵan.
Biraq jábirlenýshi Jiembaidyń bul sózine qatysty óz ýájin áleýmettik jelige jariialady. Ol densaýlyǵyna bailanysty sotqa qatysa almaǵanymen, sot protsesin jáne oǵan qatysty aqparattyq keńistiktegi ahýaldy muqiiat baqylap otyrǵanyn aitty. Berdenov Jiembaidyń málimdemesin tek shantaj jáne qysym kórsetý áreketi dep baǵalady.
«Jaýapker kelisim aiasyndaǵy jumysyn adal atqarǵysy kelmedi, esep berýden jaltardy. Men tek ashyqtyq pen mindettemelerdiń oryndalýyn talap ettim. Al qoǵam nazaryn "qyzǵanysh", "jeke qatynas", "jubaiy" sekildi jalǵan sebepterge burý ‒ manipýliatsiia, shyndyqtan alystatý. Men onyń jubaiyn da, otbasyn da tanymaimyn. Ol men úshin tek merdiger bolatyn», - dedi Rýslan Berdenov.
Oqi otyryńyz: Berdenov sottalýshynyń málimdemesine jaýap berdi
13 tamyz kúngi sot otyrysynda Rýslan Berdenovke qalai oq atylǵany týraly beinejazbalar kórsetilip, , oqiǵada qoldanylǵan «Saiga» myltyǵy, oqtar siiaqty zattai aiǵaqtar usynyldy.
Videoda ákim orynbasary ákimdik ǵimaratynan shyǵyp, baspaldaqpen tómen túsip kele jatqany kórinedi. Sosyn qarý ustaǵan adam júgirip kelip, qasha jónelgen Berdenovty qýyp júrip birneshe ret atady. Artynsha Berdenovtyń júrgizýshisi ony kólikpen qaǵady. Sotta kýálik etken sheneýniktiń kólik júrgizýshisi Meirambek Qalymbetov Jiembaidy shamamen 30–40 km/saǵ jyldamdyqpen soqqanyn aitady.
«Ony toqtatpaq boldym. Qatty emes, aqyryn soqtym. Sosyn keri sheginip, qulap qaldy. Ony ustaý úshin mashinadan júgirip shyqtym», ‒ dengen júrgizýshi qansyrap jatqan Berdenovtyń pidjagyn sheship, qandy toqtatpaq bolǵanyn aitty.
Odan keiin sot otyrysynda sot-meditsinalyq saraptamanyń qorytyndysyn jariialady. Qorytyndyǵa sáikes aiyptalýshynyń eshqandai psihikalyq aqaýy joq, óz áreketine tolyq jaýap bere alatyny aityldy. Alkogoldi synaq 21 sáýir kúni saǵat 22:01-de júrgizilip, jeńil masańdyq belgileri anyqtaldy. Sosyn sýdia oqtardyń arasyndaǵy ýaqyt aralyǵyn baiandady.
Oljas Tájibaev esimdi taǵy bir kýáger Rýslan Berdenov ózine Ernar Jiembaidy jumystan shyǵaratynyn aitqanyn málimdedi.
Jaryssóz
18 tamyzda ótken sot otyrysynda jábirlenýshiniń ózi onlain qatysyp, kýálik etti. Ol oqiǵany sipattap, sol kezde ózin qalai sezingenin aitty. Berdenov qannyń dámin sezip, ókpesi demalýdy toqtatqandai bolǵanyn jetkizdi.
Óz kezeginde aiyptalýshy Jiembai Berdenovten keshirim surap, ony óltirgisi kelmegenin aitty. Al Rýslan Berdenov qylmyskerdiń ádil jazalanýyn talap etti.
«Bul maǵan ǵana atylǵan oq emes, bul árbir memlekettik qyzmetkerge atylǵan oq», ‒ dedi sheneýnik.
Taraptardyń jaryssózi barysynda prokýror Ernar Jiembaiǵa 11 jyl 3 ai bas bostandyǵynan aiyrýdy surady.
19 tamyzda sot otyrysy jalǵasyp, sotta tóreshi óziniń ersi qylyǵymen kózge tústi. Sýdia Ábinur Qarabaev jýrnalist Botagóz Omarovaǵa tilin shyǵarǵan. Bul týraly Botagóz Omarova óziniń áleýmettik jelidegi paraqshasynda jazyp, sýdianyń tilin shyǵarǵan videosy BAQ betterinde tarap ketti.
Keiin Shymkent sotynyń baspasóz qyzmeti:
«Shymkent qalasy ákiminiń orynbasaryn óltirýge oqtalý týraly qylmystyq isti qaraý kezinde tóraǵalyq etýshi sýdia Ábinur Qarabaevtyń áreketi Sýdia ádep kodeksin buzý turǵysynan tekserilip jatyr», ‒ dep málimdedi.
Jiembaidyń sońǵy sózi
Aiyptalýshy Ernar Jiembai sot otyrysynda jábirlenýshi Rýslan Berdenovten keshirim surap, sot tóreshisinen bas bostandyǵynan aiyrmaityn jaza surady. Sonymen qatar buǵan deiin aitqan ustanymynda qalatynyn jetkizdi.
«Eshkim suramaidy, Jiembai Ernar Rýslan Berdenovty ne úshin atty dep. Tek Rýslan Berdenovty 5 ret atypty dep jazýda. Men eń aldymen osy istiń saiasilanýyn qalamaimyn. Ol memlekettik qyzmetkerlerge qarsy jasalǵan áreket emes, basynan bastap ekeýmizdiń aramyzdaǵy jeke másele bolatyn», ‒ dedi aiyptalýshy.
Sot 20 tamyzda aiaqtalyp, Ernar Jiembai 9 jylǵa bas bostandyǵynan aiyrylyp, jazasyn ortasha qaýipsizdik mekemesinde óteitin boldy.
Oqi otyryńyz: Rýslan Berdenovke oq atqan azamatqa úkim shyqty
Rýslan Berdenov kim?
Rýslan Arysbekuly Berdenov 1985 jyly týǵan, qazaqstandyq kásipker jáne qoǵam qairatkeri, 2025 jyldyń 24 aqpanyna deiin Respublica partiiasy Fraktsiiasy atynan sailanǵan Qazaqstan Parlamenti Májilisiniń depýtaty bolǵan, qazir Shymkent qalasy ákiminiń orynbasary laýazymynda.
