Foto: Sergei Bobylev / TASS
Elimizde benzin baǵasynyń kóterilýine alǵyshart joq. Bul týraly Energetika ministri Almasadam Sátqaliev aitty, dep habarlaidy QazAqparat.
«Reseide baǵa ósýi múmkin ekendigin qospaityn bolsaq, benzinniń qymbattaýyna alǵyshart joq. Qazirgi ýaqytta Qazaqstanda suranys pen tutyný kólemi teńgerimdi. Munai ónimderiniń qajetti qory jasaqtalǵan. Shamamen 1 aiǵa jetetin dizel otyny, 25 kúnge jetkilikti AI-92 jáne AI-95 benzini bar. Buǵan qosa, munai ónimderiniń atalǵan túrleriniń óndirisin qossaq, onda tapshylyq bolmaidy», - dedi ministr XV KazEnergy Eýraziialyq forýmy aiasynda BAQ ókilderiniń saýalyna orai.
Degenmen, onyń aitýynsha, qazirgi ýaqytta Reseide munai ónimderi shyǵynyn óteý úshin kólemniń tómendeýine bailanysty syn-tegeýirin bar.
«Importtyq otynnyń qymbattaý múmkindigine bailanysty táýekel bar. Ol ishki naryqtaǵy baǵaǵa proportsionaldy yqpal etedi. Biz ázirshe qalyptastyrylǵan qordy eskere otyryp, Qazaqstan Respýblikasynda óndirilgen ónimge arqa súieimiz», - dedi Almasadam Sátqaliev.
