Búgin Májilistegi elimizdiń kóshi-qon máselelerine arnalǵan Úkimet saǵatynda depýtat Bekbolat Tileýhan Qazaqstanǵa kelip azamattyq ala almai júrgen qandastarymyzdyń jaǵdaiyn aitty, dep habarlaidy QazAqparat.
«Jasyratyny joq Qytaidan, Ózbekstannan, alys-jaqyn shetelden Qazaqstanǵa azamattyq alamyz dep tarihi otanyna kelip, bosyp júrgen halyqtyń sany kóp. Osynda qujatyn rettei almai sandalyp júrgen azamattardy elimizde zańsyz júrsiń dep aiyptap, sottyń sheshimimen shyǵaryp jatqanymyz da ótirik emes. Bizdiń atymyzǵa bala-shaǵasy, otbasy músheleri jan-jaqqa shashylyp ketken azamattardan aryz-shaǵymdar kóptep túsýde. Qandai da bir úkimettik jeńildiktermen qujatyn rettep berýdi surap otyrǵan el kóp-aq», - dedi depýtat.
Máselen, onyń aitýynsha, Qaraqalpaqstannan Ereimentaýǵa 2007 jyly kóship kelgennen beri búgingi kúnge deiin Úkimetten beriletin kvotasyn da, qujatyn da rettei almai júrgen adamdar áli de mol.
«Jasyratyny joq, kóbinese keletin adamdardyń barlyǵy birdei asa saýatty emes. Diqandar, malshylar keledi. Mysal úshin Qytaidan kelgen 24 jastaǵy jigit tarihi otanynyń azamaty bolamyn degen nietpen Almaty oblysyna qujat tapsyrdy. Yqtiiar hatyn kútip júrgende úsh ai tolmai elde zańsyz júrsiń dep aiyptap, ustap, eline qaitsyn degen sottyń sheshimi shyqty. Endi joq aǵaiyn, sybyrlaǵandy qudai estimei me?! Qytai biliginiń búgingi saiasaty qazaqqa asa qolaily bolyp otyrǵan joq. Ol jerde ári-sári kúige, taǵdyrdyń talqysyna túsip qalǵan qandastarymyz qanshama. Ondai nárseni júregimizdiń túpkirimen jete túsinbesek te bolmaidy. Jalpy kómektesýden góri kedergi jasaý op-ońai», - dedi Bekbolat Tileýhan.
Onyń atap ótýinshe, bólinip-jarylǵan otbasylardyń qaita qosylýyna yqpal jasaýǵa negiz bolatyn halyqaralyq ratifikatsiialar, komissiialar, Helsinki, Vena, Jeneva konventsiialary bar.
«Soǵan súiene otyryp bir qairan jasaýǵa bolmai ma? Qandastarymyz bosyp ketti ǵoi, shyn máninde qinalyp jatyr», - dedi ol.
