بٷگٸن مەجٸلٸستەگٸ ەلٸمٸزدٸڭ كٶشٸ-قون مەسەلەلەرٸنە ارنالعان ٷكٸمەت ساعاتىندا دەپۋتات بەكبولات تٸلەۋحان قازاقستانعا كەلٸپ ازاماتتىق الا الماي جٷرگەن قانداستارىمىزدىڭ جاعدايىن ايتتى, دەپ حابارلايدى قازاقپارات.
«جاسىراتىنى جوق قىتايدان, ٶزبەكستاننان, الىس-جاقىن شەتەلدەن قازاقستانعا ازاماتتىق الامىز دەپ تاريحي وتانىنا كەلٸپ, بوسىپ جٷرگەن حالىقتىڭ سانى كٶپ. وسىندا قۇجاتىن رەتتەي الماي ساندالىپ جٷرگەن ازاماتتاردى ەلٸمٸزدە زاڭسىز جٷرسٸڭ دەپ ايىپتاپ, سوتتىڭ شەشٸمٸمەن شىعارىپ جاتقانىمىز دا ٶتٸرٸك ەمەس. بٸزدٸڭ اتىمىزعا بالا-شاعاسى, وتباسى مٷشەلەرٸ جان-جاققا شاشىلىپ كەتكەن ازاماتتاردان ارىز-شاعىمدار كٶپتەپ تٷسۋدە. قانداي دا بٸر ٷكٸمەتتٸك جەڭٸلدٸكتەرمەن قۇجاتىن رەتتەپ بەرۋدٸ سۇراپ وتىرعان ەل كٶپ-اق», - دەدٸ دەپۋتات.
مەسەلەن, ونىڭ ايتۋىنشا, قاراقالپاقستاننان ەرەيمەنتاۋعا 2007 جىلى كٶشٸپ كەلگەننەن بەرٸ بٷگٸنگٸ كٷنگە دەيٸن ٷكٸمەتتەن بەرٸلەتٸن كۆوتاسىن دا, قۇجاتىن دا رەتتەي الماي جٷرگەن ادامدار ەلٸ دە مول.
«جاسىراتىنى جوق, كٶبٸنەسە كەلەتٸن ادامداردىڭ بارلىعى بٸردەي اسا ساۋاتتى ەمەس. ديقاندار, مالشىلار كەلەدٸ. مىسال ٷشٸن قىتايدان كەلگەن 24 جاستاعى جٸگٸت تاريحي وتانىنىڭ ازاماتى بولامىن دەگەن نيەتپەن الماتى وبلىسىنا قۇجات تاپسىردى. ىقتييار حاتىن كٷتٸپ جٷرگەندە ٷش اي تولماي ەلدە زاڭسىز جٷرسٸڭ دەپ ايىپتاپ, ۇستاپ, ەلٸنە قايتسىن دەگەن سوتتىڭ شەشٸمٸ شىقتى. ەندٸ جوق اعايىن, سىبىرلاعاندى قۇداي ەستٸمەي مە?! قىتاي بيلٸگٸنٸڭ بٷگٸنگٸ ساياساتى قازاققا اسا قولايلى بولىپ وتىرعان جوق. ول جەردە ەرٸ-سەرٸ كٷيگە, تاعدىردىڭ تالقىسىنا تٷسٸپ قالعان قانداستارىمىز قانشاما. ونداي نەرسەنٸ جٷرەگٸمٸزدٸڭ تٷپكٸرٸمەن جەتە تٷسٸنبەسەك تە بولمايدى. جالپى كٶمەكتەسۋدەن گٶرٸ كەدەرگٸ جاساۋ وپ-وڭاي», - دەدٸ بەكبولات تٸلەۋحان.
ونىڭ اتاپ ٶتۋٸنشە, بٶلٸنٸپ-جارىلعان وتباسىلاردىڭ قايتا قوسىلۋىنا ىقپال جاساۋعا نەگٸز بولاتىن حالىقارالىق راتيفيكاتسييالار, كوميسسييالار, حەلسينكي, ۆەنا, جەنەۆا كونۆەنتسييالارى بار.
«سوعان سٷيەنە وتىرىپ بٸر قايران جاساۋعا بولماي ما? قانداستارىمىز بوسىپ كەتتٸ عوي, شىن مەنٸندە قينالىپ جاتىر», - دەدٸ ول.
