Qazaqstannyń aviatsiialyq ákimshiligi «Bek Eir» aviakompaniiasynyń paidalanýshy jáne áýe kemeleriniń ushýǵa jaramdylyǵy týraly sertifikatyn qaitaryp alǵan bolatyn. Osyǵan bailanysty QR Indýstriia jáne infraqurylymdyq damý ministrligi atalǵan áýe kompaniianyń buryn satyp alynǵan áýe biletteriniń aqshasyn jolaýshylarǵa qaitarýǵa qatysty birqatar suraq týyndaǵanyn aitty, dep habarlaidy "Ult aqparat".
Eńbek zańnamasyna sáikes «Bek Eir» AQ qyzmetkerlerin eńbek jaǵdailarynyń ózgergeni týraly jazbasha habardar etýge, olardyń eńbek qyzmetin rastaityn qujattardy berýge, sondai-aq qyzmetkerlerine ótemaqy tólemderin júzege asyrýǵa tiis.
«Investitsiialar jáne damý ministriniń 2015 jylǵy 30 sáýirdegi № 540 buiryǵymen bekitilgen Jolaýshylardy, bagajdy jáne júkterdi áýe kóligimen tasymaldaý qaǵidalaryna sáikes áýe kompaniiasy buryn satyp alynǵan biletter úshin jolaýshylarǵa aqshany qaitarýǵa mindetti. Qazaqstannyń aviatsiialyq ákimshiligi jáne Azamattyq aviatsiia komiteti «Bek Eir» AQ-nyń jumystan shyǵarylǵan qyzmetkerlerine balama jumys tabýǵa kómektesedi. Aldaǵy kúnderi arnaiy sait ashylady. Onda áýe kompaniianyń qyzmetkerleri jumys izdeý úshin tirkele alady», - dep habarlady ministrlikten.
Eske sala keteiik, 2019 jyldyń 27 jeltoqsanynda Almaty-Nur-Sultan baǵytyndaǵy ushaq apatqa ushyrady. Bortynda 93 jolaýshy jáne 5 ekipaj múshesi boldy. Áýe kemesiniń komandiri 57 jastaǵy Marat Muratbaev oqiǵa ornynda ajal qushty.
Ushaq jerge qulaǵan soń syrǵanap baryp áýejai aýmaǵyna jaqyn ornalasqan eki qabatty úige soǵyldy. Saldarynan 12 adam qaza tapty. Osydan keiin Bek Air áýe kompaniiasyna tiesili toǵyz Fokker-100 ushaǵynyń qyzmeti toqtatyldy.
Arada bir ai ótkennen keiin apatqa ushyraǵan Bek Air ushaǵynyń ekinshi ushqyshy qaza boldy.
