Fokker 100 ushaǵynyń apatqa ushyraýyna bailanysty qurylǵan úkimettik komissiia ushqyshtardyń áńgimesin zerttep shyqty. Osy jáne basqa da parametrlik kórsetkishterdiń negizinde apattyń hronologiiasy jasaldy, dep habarlaidy "Ult aqparat" Sputnik agenttigine silteme jasap.
Hronologiia
-
7:20:02 - ushaq jolaqqa shyǵady;
-
7:20:41 - ekipaj aldyńǵy shassidi kóterýdi bastaidy;
-
7:20:45 - ushaq maksimaldy jyldamdyqpen jerden kóteriledi;
Indýstriia jáne infraqurlymdyq damý ministri Roman Skliardyń aitýynsha, ushaq jerden kóterilgen boida aldymen sol jaqqa, odan keiin oń jaqqa qisaia bastaidy. Ekipaj ushý traektoriiasyn ustap qalýǵa tyrysty. Osydan keiin negizgi shassi jáne ushaqtyń sol jaq qanaty jerge tiedi.
7:20:53 – ushaq ońǵa qarai qisaiady. Osy kezde komandir: "Ne bolyp qaldy?", - dep suraidy.
7:20:54 – ekinshi pilottyń jaýaby: "Ne bolǵanyn bilmeimin. Stabilizator... Toqta... Men bul jerge túsemin (ary qarai boqaýyz sózder ketedi)".
"Osy kezde ekinshi ushqysh qozǵaltqyshtardyń jumysyn baiaýlatyp, ushýdy toqtatýǵa áreket jasaǵan sekildi. Alaida birneshe sekýndtan keiin qozǵaltqyshtardyń jumysy taǵy 93-95 protsentke artyp, áýe kemesi ushýdy jalǵastyrady", - deidi Skliar.
7:20:57 – komandir ekinshi ushqyshqa: "Kerek emes. Ne istep jatyrsyń?", - dep aitady. Sóitip, jyldamdyqty arttyryp, "Kettik! Kettik!" deidi.
7:21:04 – komandir shassidi alyp tastaýǵa buiryq beredi;
"Osydan keiin ushaq birneshe ret jerdi syzyp ótti. Quiryǵymen alty ret, shassimen tórt ret jáne qanatymen bir ret ushý jolaǵyna soǵylyp, sol jaq qaýipsizdik jolaǵyna syrǵanap ketken. Osy kezde ushý jolaǵynyń 38 shamy qirady", - dep atap kórsetti Skliar.
7:21:15 – bes metr biiktikte shassidi alyp tastaǵan, artynan ushaq fiýzeliajben jerge jatyp, ushý alańynyń syrtyna shyǵyp ketken,
Apattyń negizgi sebebi
Búgin úkimettik komissiia Almaty túbindegi Bek Air áýe kompaniiasy ushaǵynyń apatqa ushyraý sebebiniń aldyn ala boljamyn jariialady.
"Ushaq syrtyna muzdyń qatyp qalýy – negizgi sebep. Áýe kemesi turaqta eki táýlik turǵan", - dep málim etti premer-ministrdiń orynbasary, indýstriia jáne infraqurlymdyq damý ministri Roman Skliar.
Komissiia ushaqtyń syrtyndaǵy qatyp qalǵan muzdy eritý jumystary jartylai ǵana jasalǵanyn anyqtaǵan.
"Ushaq komandiri arnaiy suiyqtyqpen tek stabilizatordy ǵana óńdeýge sheshim qabyldaǵan. Ushaqtyń qanattary óńdelgen joq. Ol kúni Atyraýǵa ushqan týra sondai ushaqtyń da syrty suiyqtyqpen óńdelmegeni anyqtaldy", - dedi Skliar.
Ushaq apaty 27 jeltoqsan tańǵy saǵat jetide boldy. Bek Air áýe kompaniiasynyń "Almaty – Nur-Sultan" baǵytyndaǵy Fokker 100 ushaǵy Almaty mańyna qulady.
Ushaqta 93 jolaýshy men 5 ekipaj múshesi bolǵan. Apat 12 adamnyń ómirin qidy, qaza bolǵandardyń ishinde ushaq komandiri bar. Ekinshi ushqysh jansaqtaý bólimine tústi. Qazir ol esin jidy.
Ishki ister ministrligi áýe apatyna sebep bolǵan úsh jaǵdaidy atady. Olar: ekipaj qateligi, tehnikalyq aqaý jáne navigatsiialyq qyzmet jumysy.
Ushaqtyń qara jáshigi Máskeýdegi memleketaralyq aviatsiia komitetine tapsyryldy. Tergeýdiń aldyn ala qorytyndysy 10 qańtarǵa deiin jariialanady degen jospar bolǵan.
Prezident tapsyrmasymen premer-ministr jetekshilik etetin komissiia quryldy. Toqaev apattyń sebebin anyqtap, kinálilerdi qatań jazalaýdy tapsyrdy. 28 jeltoqsan elimizde jalpyulttyq aza tutý kúni bolyp jariialanǵan bolatyn.
