Bek Air áýe kompaniiasynyń basshysy Nurlan Jumasultanov Almaty túbindegi apat kezinde ekinshi ushqysh qatelik jasady dep esepteidi. Bul týraly ol 31 arnaǵa bergen suhbatynda aitqan.
"Ushqan soń ushaq jan-jaqqa shaiqala bastady. Komandir: "Ne boldy?" dep surady. Al ekinshi pilot: "Stabilizator, tejeý kerek" dep jaýap berdi. Ushaq mundai jyldamdyqpen kele jatqanda tejeý nemese ushý týraly sheshim qabyldamaityn kez ekenin moiyndaimyn. Ekinshi ushqysh qozǵaltqyshtyń jumysyn báseńdetken kezde qatelik jasady dep oilaimyn", - dedi ol.
Aita ketsek, buǵan deiin ushqyshtar sóziniń jazbasyna súienip, premer-ministr orynbasary Roman Skliar apattyń negizgi sebebin ataǵan bolatyn. Onyń aitýynsha, ushaq syrtyna muzdyń qatyp qalýy – negizgi sebep.
Áýe kompaniiasynyń basshysy da apat sebebine bailanysty komissiianyń aldyn ala boljamymen kelisip otyr.
Memleketaralyq aviatsiialyq komitet ushaqtyń ózdiginen jazatyn quralyndaǵy jazbalardy oqydy. Barlyq aqparat tergeý komissiiasyna berildi. Aqparattyń aldyn ala saraptamasy oqiǵanyń hronologiiasy men apattyń negizgi sebebin anyqtaýǵa jaǵdai jasaityny týraly aityldy.
Almaty túbindegi ushaq apaty
Ushaq apaty 2019 jyldyń 27 jeltoqsanynda tańǵy saǵat jetide boldy. Bek Air áýe kompaniiasynyń "Almaty – Nur-Sultan" baǵytyndaǵy Fokker 100 ushaǵy Almaty mańyna qulady.
Ushaqta 93 jolaýshy men 5 ekipaj múshesi bolǵan. Apat 12 adamnyń ómirin qidy, qaza bolǵandardyń ishinde ushaq komandiri bar. Ekinshi ushqysh aýrýhanada jatyr.
Ishki ister ministrligi áýe apatyna sebep bolǵan úsh jaǵdaidy atady. Olar: ekipaj qateligi, tehnikalyq aqaý jáne navigatsiialyq qyzmet jumysy.
Prezident tapsyrmasymen premer-ministr jetekshilik etetin komissiia quryldy. Toqaev apattyń sebebin anyqtap, kinálilerdi qatań jazalaýdy tapsyrdy. 28 jeltoqsan elimizde jalpyulttyq aza tutý kúni boldy.
