Bek Air ەۋە كومپانيياسىنىڭ باسشىسى نۇرلان جۇماسۇلتانوۆ الماتى تٷبٸندەگٸ اپات كەزٸندە ەكٸنشٸ ۇشقىش قاتەلٸك جاسادى دەپ ەسەپتەيدٸ. بۇل تۋرالى ول 31 ارناعا بەرگەن سۇحباتىندا ايتقان.
"ۇشقان سوڭ ۇشاق جان-جاققا شايقالا باستادى. كوماندير: "نە بولدى?" دەپ سۇرادى. ال ەكٸنشٸ پيلوت: "ستابيليزاتور, تەجەۋ كەرەك" دەپ جاۋاپ بەردٸ. ۇشاق مۇنداي جىلدامدىقپەن كەلە جاتقاندا تەجەۋ نەمەسە ۇشۋ تۋرالى شەشٸم قابىلدامايتىن كەز ەكەنٸن مويىندايمىن. ەكٸنشٸ ۇشقىش قوزعالتقىشتىڭ جۇمىسىن بەسەڭدەتكەن كەزدە قاتەلٸك جاسادى دەپ ويلايمىن", - دەدٸ ول.
ايتا كەتسەك, بۇعان دەيٸن ۇشقىشتار سٶزٸنٸڭ جازباسىنا سٷيەنٸپ, پرەمەر-مينيستر ورىنباسارى رومان سكليار اپاتتىڭ نەگٸزگٸ سەبەبٸن اتاعان بولاتىن. ونىڭ ايتۋىنشا, ۇشاق سىرتىنا مۇزدىڭ قاتىپ قالۋى – نەگٸزگٸ سەبەپ.
ەۋە كومپانيياسىنىڭ باسشىسى دا اپات سەبەبٸنە بايلانىستى كوميسسييانىڭ الدىن الا بولجامىمەن كەلٸسٸپ وتىر.
مەملەكەتارالىق اۆياتسييالىق كوميتەت ۇشاقتىڭ ٶزدٸگٸنەن جازاتىن قۇرالىنداعى جازبالاردى وقىدى. بارلىق اقپارات تەرگەۋ كوميسسيياسىنا بەرٸلدٸ. اقپاراتتىڭ الدىن الا ساراپتاماسى وقيعانىڭ حرونولوگيياسى مەن اپاتتىڭ نەگٸزگٸ سەبەبٸن انىقتاۋعا جاعداي جاسايتىنى تۋرالى ايتىلدى.
الماتى تٷبٸندەگٸ ۇشاق اپاتى
ۇشاق اپاتى 2019 جىلدىڭ 27 جەلتوقسانىندا تاڭعى ساعات جەتٸدە بولدى. Bek Air ەۋە كومپانيياسىنىڭ "الماتى – نۇر-سۇلتان" باعىتىنداعى Fokker 100 ۇشاعى الماتى ماڭىنا قۇلادى.
ۇشاقتا 93 جولاۋشى مەن 5 ەكيپاج مٷشەسٸ بولعان. اپات 12 ادامنىڭ ٶمٸرٸن قيدى, قازا بولعانداردىڭ ٸشٸندە ۇشاق كومانديرٸ بار. ەكٸنشٸ ۇشقىش اۋرۋحانادا جاتىر.
ٸشكٸ ٸستەر مينيسترلٸگٸ ەۋە اپاتىنا سەبەپ بولعان ٷش جاعدايدى اتادى. ولار: ەكيپاج قاتەلٸگٸ, تەحنيكالىق اقاۋ جەنە ناۆيگاتسييالىق قىزمەت جۇمىسى.
پرەزيدەنت تاپسىرماسىمەن پرەمەر-مينيستر جەتەكشٸلٸك ەتەتٸن كوميسسييا قۇرىلدى. توقاەۆ اپاتتىڭ سەبەبٸن انىقتاپ, كٸنەلٸلەردٸ قاتاڭ جازالاۋدى تاپسىردى. 28 جەلتوقسان ەلٸمٸزدە جالپىۇلتتىق ازا تۇتۋ كٷنٸ بولدى.
