Baiqońyrdaǵy reseilik mektepterdiń sabaq kestesine Qazaq tili men ádebieti jáne Qazaqstan tarihyn engizý úshin Resei tarapynyń ruqsatyn alý kerek. Bul týraly Senat depýtattarynyń saýalyna QR Premer-Ministri Asqar Maminiń jaýabynda aitylǵan, dep habarlaidy "Ult aqparat".
«Baiqońyr qalasynyń 7 mektebinde oqytý Resei Federatsiiasynyń Memlekettik jalpyǵa mindetti bilim berý standarttaryna sáikes júrgiziledi. Bul mektepterde qazaqstandyq balalar da oqidy. Olar óz bolashaǵyn Qazaqstanmen bailanystyratyndyqtan, olar úshin Qazaqstan tarihyn, qazaq tili men ádebietin bilý mańyzdy bolyp tabylady. Mektep baǵdarlamasyna atalǵan pánderdi engizý úshin Resei Federatsiiasynyń Oqý-aǵartý ministrliginiń ruqsaty qajet», - dedi Úkimet basshysy.
Onyń atap ótýinshe, Baiqońyr qalasyndaǵy reseilik mektepterde Qazaqstan tarihy, qazaq tili men ádebieti pánderin oqytý týraly másele Bilim berý salasyndaǵy yntymaqtastyq jónindegi úkimetaralyq komissiianyń 22-shi otyrysynyń kún tártibine engizildi. Otyrys 2020 jylǵy 10 qarashada ótti.
«Alaida Baiqońyr qalasy boiynsha Qazaqstan-Resei úkimetaralyq komissiiasynyń bólek otyrysynda qaraýdyń oryndylyǵy týraly sheshim qabyldanyp, atalǵan másele kún tártibinen alynyp tastaldy. Baiqońyr qalasyndaǵy 7 mekteptiń bireýin Resei Federatsiiasynyń balansynan alyp Qazaqstannyń kommýnaldyq menshigine berý máselesi de bilim berý salasyndaǵy yntymaqtastyq jónindegi úkimetaralyq kezekti komissiianyń otyrysynda qarastyrylatyn bolady», - dedi Asqar Mamin.
Bul rette, Úkimet basshysy Qazaqstan Respýblikasynyń azamattaryn qazaqstandyq Memlekettik jalpyǵa mindetti bilim berý standarttary boiynsha oqytý máselesin sheshý úshin 2019-2020 oqý jylynan bastap № 275 orta mekteptiń bazasynda orys tilinde oqytatyn bastaýysh synyptar (1-4 synyptarda – 80 oqýshy, sondai-aq mektepaldy daiarlyq synybynda – 22 tárbielenýshi) ashylǵanyn aitady.
«Sonymen qatar 2020 jyly Qyzylorda oblysynyń ákimdigi Resei Federatsiiasy mektepterindegi qazaqstandyq 5-11 synyp oqýshylary úshin 2020-2021 oqý jylynda Qazaqstan Respýblikasy standarty boiynsha orys tilinde oqytylatyn synyptardy (№ 275 mektep bazasynda) ashý boiynsha uiymdastyrý jumysyn júrgizdi. Keleshekte orys tilinde oqytatyn qosymsha synyptar ashýdy jalǵastyrý josparlanýda. Kóterilgen máseleler Úkimettiń baqylaýynda», - dedi Premer-Ministr.
