بايقوڭىرداعى رەسەيلٸك مەكتەپتەردٸڭ ساباق كەستەسٸنە قازاق تٸلٸ مەن ەدەبيەتٸ جەنە قازاقستان تاريحىن ەنگٸزۋ ٷشٸن رەسەي تاراپىنىڭ رۇقساتىن الۋ كەرەك. بۇل تۋرالى سەنات دەپۋتاتتارىنىڭ ساۋالىنا قر پرەمەر-مينيسترٸ اسقار مامينٸڭ جاۋابىندا ايتىلعان, دەپ حابارلايدى "ۇلت اقپارات".
«بايقوڭىر قالاسىنىڭ 7 مەكتەبٸندە وقىتۋ رەسەي فەدەراتسيياسىنىڭ مەملەكەتتٸك جالپىعا مٸندەتتٸ بٸلٸم بەرۋ ستاندارتتارىنا سەيكەس جٷرگٸزٸلەدٸ. بۇل مەكتەپتەردە قازاقستاندىق بالالار دا وقيدى. ولار ٶز بولاشاعىن قازاقستانمەن بايلانىستىراتىندىقتان, ولار ٷشٸن قازاقستان تاريحىن, قازاق تٸلٸ مەن ەدەبيەتٸن بٸلۋ ماڭىزدى بولىپ تابىلادى. مەكتەپ باعدارلاماسىنا اتالعان پەندەردٸ ەنگٸزۋ ٷشٸن رەسەي فەدەراتسيياسىنىڭ وقۋ-اعارتۋ مينيسترلٸگٸنٸڭ رۇقساتى قاجەت», - دەدٸ ٷكٸمەت باسشىسى.
ونىڭ اتاپ ٶتۋٸنشە, بايقوڭىر قالاسىنداعى رەسەيلٸك مەكتەپتەردە قازاقستان تاريحى, قازاق تٸلٸ مەن ەدەبيەتٸ پەندەرٸن وقىتۋ تۋرالى مەسەلە بٸلٸم بەرۋ سالاسىنداعى ىنتىماقتاستىق جٶنٸندەگٸ ٷكٸمەتارالىق كوميسسييانىڭ 22-شٸ وتىرىسىنىڭ كٷن تەرتٸبٸنە ەنگٸزٸلدٸ. وتىرىس 2020 جىلعى 10 قاراشادا ٶتتٸ.
«الايدا بايقوڭىر قالاسى بويىنشا قازاقستان-رەسەي ٷكٸمەتارالىق كوميسسيياسىنىڭ بٶلەك وتىرىسىندا قاراۋدىڭ ورىندىلىعى تۋرالى شەشٸم قابىلدانىپ, اتالعان مەسەلە كٷن تەرتٸبٸنەن الىنىپ تاستالدى. بايقوڭىر قالاسىنداعى 7 مەكتەپتٸڭ بٸرەۋٸن رەسەي فەدەراتسيياسىنىڭ بالانسىنان الىپ قازاقستاننىڭ كوممۋنالدىق مەنشٸگٸنە بەرۋ مەسەلەسٸ دە بٸلٸم بەرۋ سالاسىنداعى ىنتىماقتاستىق جٶنٸندەگٸ ٷكٸمەتارالىق كەزەكتٸ كوميسسييانىڭ وتىرىسىندا قاراستىرىلاتىن بولادى», - دەدٸ اسقار مامين.
بۇل رەتتە, ٷكٸمەت باسشىسى قازاقستان رەسپۋبليكاسىنىڭ ازاماتتارىن قازاقستاندىق مەملەكەتتٸك جالپىعا مٸندەتتٸ بٸلٸم بەرۋ ستاندارتتارى بويىنشا وقىتۋ مەسەلەسٸن شەشۋ ٷشٸن 2019-2020 وقۋ جىلىنان باستاپ № 275 ورتا مەكتەپتٸڭ بازاسىندا ورىس تٸلٸندە وقىتاتىن باستاۋىش سىنىپتار (1-4 سىنىپتاردا – 80 وقۋشى, سونداي-اق مەكتەپالدى دايارلىق سىنىبىندا – 22 تەربيەلەنۋشٸ) اشىلعانىن ايتادى.
«سونىمەن قاتار 2020 جىلى قىزىلوردا وبلىسىنىڭ ەكٸمدٸگٸ رەسەي فەدەراتسيياسى مەكتەپتەرٸندەگٸ قازاقستاندىق 5-11 سىنىپ وقۋشىلارى ٷشٸن 2020-2021 وقۋ جىلىندا قازاقستان رەسپۋبليكاسى ستاندارتى بويىنشا ورىس تٸلٸندە وقىتىلاتىن سىنىپتاردى (№ 275 مەكتەپ بازاسىندا) اشۋ بويىنشا ۇيىمداستىرۋ جۇمىسىن جٷرگٸزدٸ. كەلەشەكتە ورىس تٸلٸندە وقىتاتىن قوسىمشا سىنىپتار اشۋدى جالعاستىرۋ جوسپارلانۋدا. كٶتەرٸلگەن مەسەلەلەر ٷكٸمەتتٸڭ باقىلاۋىندا», - دەدٸ پرەمەر-مينيستر.
