Resei prezidenti Vladimir Pýtin AQSh prezidenti Djo Baidenniń jaqynda jaryq kórgen suhbatyna qatysty pikirin aitty. Suhbatta Baiden Pýtindi "qanisher" dep sanaisyz ba degen suraqqa "iá" dep jaýap bergen.
Memlekettik "Rossiia-24" telearnasy júrgizgen transliatsiia kezinde Pýtin Amerikany otarlaý kezinde "jergilikti halyqqa genotsid" jasalǵanyn jáne Ekinshi dúniejúzilik soǵystyń aiaǵynda Japoniia qalalaryna atom bombasyn tastaýdyń "mánsiz áreket" bolǵanyn atap ótken.
"Amerikalyq áriptesimniń málimdemesine kelsek, ol aitqandai bizdiń shynymen de jeke tanystyǵymyz bar. Oǵan endi ne deiin? Men oǵan "denińiz saý bolsyn" dep aitar edim" dedi Pýtin anneksiialanǵan Qyrymdaǵy qoǵam ókilderimen uiymdastyrylǵan telekópir kezinde.
Pýtin Baidenniń málimdemesine bailanysty árbir adam ózge adamnan óz beinesin kóredi dep aitqan. "Bala kezde aýlada bir-birimizben daýlasyp qalǵan kezde aitýshy edik: "Kim bireýdi jaman atpen atasa, ózi sol atqa laiyq" ("Kto kak obzyvaetsia, tot tak i nazyvaetsia"). Jáne bul jái balalar aýzyndaǵy mátel nemese qaljyń emes" dedi 68 jastaǵy saiasatker.
Ol odan keiin AQSh-ty otarlaý men Ekinshi dúniejúzilik soǵys kezindegi Japoniiany bombalaý, AQSh-taǵy áleýmettik máseleler, onyń ishinde Black Lives Matter qozǵalysy tóńiregindegi máselelerdi atap ótken.
Onyń sózine qaraǵanda, "reseilikter men amerikalyqtardyń genetikalyq jáne mádeni-adamgershilik kody ártúrli". Alaida AQSh-qa "sanktsiialar men qorlaýǵa qaramastan" Reseimen sanasýyna "týra keledi" degen.
Beisenbi kúni sál erterek Pýtinniń baspasóz hatshysy Dmitrii Peskov Baidenniń sózin "óte nashar" málimdeme dep atap, buǵan deiin tarihta mundai oqiǵa bolmaǵanyn alǵa tartqan (Onyń sózinen "Medýza" tsitata keltirgen). Resei Baiden suhbaty jariialanǵannan keiin Vashingtondaǵy elshisin Máskeýge qaitarǵan. Ádette bul qadam saiasi narazylyqtyń belgisi retinde baǵalanady.
