AQSh-taǵy prezident sailaýynyń jeńimpazy Djo Baiden Lloid Ostindi qorǵanys ministri etip taǵaiyndaitynyn málimdedi. Otstavkadaǵy general kandidatýrasyn kongress qoldasa, Ostin Pentagondy basqaratyn alǵashqy afroamerikalyq azamat atanady.
Zań boiynsha, Pentagon basshysy qyzmetine taǵaiyndalatyn adam otstavkada keminde 7 jyl bolýy tiis. 67 jastaǵy Ostin zeinetke 2016 jyly shyqqan. Sol sebepti bul qyzmetke otyrý úshin onyń kandidatýrasyn kongrestiń qos palatasy maquldaýy kerek. Qorǵanys ministrligin 2017-2019 jyldary basqarǵan Djeims Mettis te Pentagon jetekshisi bolar aldynda kongresten ruqsat suraǵan edi.
Amerika aqparat quraldary Ostindi "kópshilik kózine túsýden qashqaqtaityn adam" dep sipattaidy. Ol 2013-2016 jyldary AQSh-tyń Taiaý Shyǵystaǵy áskerin baqylaityn ortalyq qarýly kúshter basqarmasynyń jetekshisi qyzmetin atqarǵan.
Ostindi "Amerikaǵa qajet adam" dep sipattaǵan Baiden onyń kandidatýrasyn tezirek maquldaýǵa shaqyrdy.
Synshylar jaqynda ǵana otstavkaǵa ketken generaldy Pentagon basshysy etip taǵaiyndaýdy orynsyz sheshim dep sanaidy.
Baiden aldaǵy ýaqytta Amerika qoǵamynyń shynaiy beinesin kórsetetin kabinetti tanystyrýǵa ýáde etti. Qarjy ministrliginiń hatshysy qyzmetine alǵash ret áiel adam - Djanet Iellen taǵaiyndalmaq. Alehandro Maiorkas - AQSh ishki qaýipsizdik ministrligin basqaratyn alǵashqy immigrant bolmaq.
