Tanymal qazaqstandyq prodiýser Baian Alagózova "Qozy Kórpesh-Baian Sulý" telehikaiasyna qatysty aitylǵan synǵa jaýap berdi. Dálirek aitqanda, ol ashýǵa býlyǵa jazǵan postyn (Instagram paraqshasynda) tarihi kinony túsirýge jumsalǵan qarajatty qaitarýdy talap etken Qazaqstannyń eńbek sińirgen mádeniet qairatkeri Merýert Túsipbaevaǵa arnaǵan.
Alagózova jazǵandai, telehikaiany túsirý úshin kompaniiaǵa 54 million teńge bólinipti, iaǵni ár bólim úshin 9 million teńgeden. Onyń 22 paiyzy salyqqa ketse, ár bólimge 7 million teńgeden ǵana qalǵan, demek 21 myń dollar.
"Meni kinomen ainalysatyndar ǵana túsinedi, 21 myń dollar aqshaǵa tarihi telehikaiany qalai túsiresiń?" — dep jazdy prodiýser.
Ol túsirilimge óz qaltasynan 13 million teńge qosqanyn jasyrmady jáne ol úshin ókinbeitinin de aitty.
Alagózova akterlerdiń qazaq tilinde aktsentpen sóilep, jalpy tarihi oqiǵanyń zamanaýi úlgide usynylǵanyn aitqan áleýmettik jeli qoldanýshylaryna da jaýap berdi.
"Maǵan birnárse qyzyq, Facebook-tegi aqylgóiler kóne ǵasyrda qazaqtardyń qalai sóilegenin qaidan biledi? Sońǵy derekterge súiensek, jyr bizdiń dáýirimizge deiingi III ǵasyrda bolǵan. Báriń sáýegeisińder me? Joq, shyǵarmashylyq kózqarastan ada, kóptigimen ǵana alatyn qarapaiym adamsyńdar", — dedi ol.
Alagózova belgili ánshi, aktrisa Merýert Túsipbaevaǵa oiyndaǵysynyń bárin aityp saldy. Baian Alagózovanyń sózine súiensek, Merýert Túsipbaeva atalmysh serial túsirilmes buryn serialdyń kasting direktoryna birneshe ret habarlasyp, Baian sulýdyń anasyn somdaǵysy keletinin aitqan eken. Sondai-aq jańa jyldyq baǵdarlamanyń túsirilimine qatysqysy kelgen ánshi barlyǵynan shettetilip qalypty. Prodiýser óz kezeginde ánshiden "keshirim" surap, jaqsy án jazýǵa keńes berdi.
"Serialdy efirden alyp tastasyn dep, 217 adamnyń qolyn jinapty. Qalaisha oǵan ter tókken júzdegen adamnyń eńbegin op-ońai joqqa shyǵarýǵa bolady? Men endi oǵan qoldaý bildiretin adamdardy jinaiyn. Qurmetti dostar, kinoǵa kózqarasyńyz oń bolsa, "qoldaimyn" dep pikir qaldyryp, aty-jónderińizdi jariialaýdy ótinemin", - dep jazdy ol.
Ult portaly
