Almatyda qalalyq Iskerlik keńestiń otyrysy ótti. Araǵa jyl salyp kezdesken keńestiń quramy biyl 70 paiyzǵa jańǵyrǵanyn erekshe atap ótken jón. Megapolistegi múddeli isker qaýymnyń basyn qosqan aýqymdy jiynǵa qala ákimi Baýyrjan Baibek tóraǵalyq etti. Kezekti otyrysta Almaty týrizmin damytýdyń túitkilderi, memlekettik baǵdarlamalar aiasynda shaǵyn jáne orta biznesti qoldaýdyń jai-japsary, sondai-aq Qazaqstandaǵy riteildi damytýdyń máselesi qaraldy.
Ótken jylmen salystyrǵanda biylǵy jyly Iskerlik keńestiń quramy 35-ten 46 adamǵa deiin artyp, áielder sany ósip otyr. Qala ákiminiń aitýynsha, burynǵydai Iskerlik keńestiń quramynda kezdeisoq adamdar joq. Qazirgi quramda biznes ókilderi 87 paiyzǵa kóbeidi.
Qala basshysy ShOB-tyń damýy týraly aita kele, kásipkerlermen memlekettik qoldaýdyń qarjylai jáne qarjysyz ólshemderi boiynsha jumystyń kúsheitiletinin málimdedi. Jyl basynan «Biznestiń jol kartasy-2020» jobala ry sany – 2,5 ese (228), nesie qaltasy – 2 ese (60 mlrd deiin), sýbsidiia kólemi 2 ese (12 mlrd deiin ) ósti. Shaǵyn kásipkerlikke 30 paiyzdyq ósimmen 636 mlrd teńge nesie bólindi, dedi ákim.
Qala ákimi ekonomikany quratyn da, qalyptastyratyn da adam kapitaly ekendigin aita kele, 86 paiyzy saýda men qyzmet kórsetý salasyna tiesili ekonomikanyń jergilikti qurylymy esebinen jumyssyzdyqty tómendetýdiń bólek baǵdarlamasy ázirlenip jatqandyǵyn atady. Bul baǵdarlama týrizm ne oǵan qatysty salalardy beiimdeitin bolady.
Máselen, qazirgi tańda Almatyda 137 qonaqúi bolsa, olardyń qyzmet kórsetý sapasy sanattaryna sai ma degen saýal jii aldan shyǵady. Sol siiaqty, áýejaidan bastap týristerdi kútip alý men shyǵaryp salýdyń arasynda syrttan kelgen qonaqtardy qyzyqtyrýdyń basqa qandai amaldary bar?
Qala basshysy bul jiynda áleýmettik salada, indýstriialandyrý kartasy aiasynda júzege asqan jobalarǵa toqtaldy. Indýstriialandyrý kartasynyń birinshi besjyldyǵy sheńberinde 3 335 jumys orny qurylǵan, quny 280,4 milliard teńge bolatyn 20 joba iske qosylǵan.
Sondai-aq, Almaty qalasynyń ákimi memlekettik baǵdarlamalar arqyly órkendep jatqan kásiporyndarǵa ǵana emes, óz betinshe damyp jatqan shaǵyn jáne orta biznes ókilderine de qoldaý kórsetip, nazar aýdarý qajettigin basa aitty.
Iskerlik keńeste qol jetkizilgen úlken jetistik – Almaty qalalyq ákimdigi men «Damý» qory qalanyń týrizm, innovatsiia jáne tamaq ónerkásibi salasyn qarjylandyrýǵa 4 milliard teńge bólgeni týraly memorandýmǵa qol qoiyldy. Qomaqty qarajat qalanyń týrizm, innovatsiia jáne tamaq ónerkásibi salasyn qarjylandyrýǵa baǵyttalady.
Munymen qatar, eki tarap «Almaty týrizm», «Almaty ónim», «Almaty innovatsiialar» baǵdarlamalary boiynsha bólingen qarajattyń kem degende 25 paiyzy start-up jobalarǵa berilýi kerek dep kelisti.
«Almaty qalasy – shaǵyn jáne orta kásipkerlik nysandary jaǵynan alǵashqy orynda. Munda 182 ShOB kásiporyny bar. Bul – respýblikalyq kórsetkishtiń 15 paiyzy. Jumyspen qamtylǵan halyq sany jaǵynan da birinshi orynda. Degenmen jeńildikpen nesielendirýdi qajet etetin salalar da bar. Ol – týrizm, tamaq ónerkásibi jáne innovatsiialyq salalar. Mysaly, «Almaty týrizm» baǵdarlamasy boiynsha biz qolóner sheberlerin erekshe kádesyilar jasaýǵa yntalandyrǵymyz keledi. Bul aldaǵy 2017 jylǵy Ýniversiada men EKSPO-2017 kezinde mańyzdy. «Almaty ónim» baǵdarlamasy boiynsha kásipkerler tamaq pen alkogolsiz sýsyn shyǵarýǵa jeńildikti nesiege, fermerler óz ónimderin ótkizetin naryqqa qol jetkizedi. Eń bastysy, bólingen qarajattyń 25 paiyzy jańa kásiporyndar men jańa baǵyttardy qolǵa alatyn start-up jobalarǵa bólinetini. Ákimdik úshin bul qala biýdjetine túsetin salyq pen jańa jumys oryndary», dedi «Damý» qorynyń basqarma tóraǵasy Qanysh Týleýshin.
Ainash ESALI,
«Egemen Qazaqstan»
ALMATY
.jpeg)