Batys Qazaqstan oblysynyń ákimi Altai Kúlginov 56 million teńge turatyn Audi A8 markaly qyzmettik kólik aldy, - dep habarlaidy "Ýralskaia nedelia" gazeti.
Basylymnyń málimeti boiynsha, aimaq basshysynyń baspasóz qyzmeti bul aqparatty rastady. Sonymen birge, qymbat kóliktiń Qazaqstandaǵy Audi markasynyń resmi dileri Mercur Auto kompaniiasynan alynǵany da málimdelgen. Alaida baspasóz qyzmetiniń ókilderi basylymǵa birneshe minýttan keiin qońyraý shylap, kóliktiń jergilikti kásipkerlerden jalǵa alynǵanyn aitqan.
"Qarajatty únemdeý úshin kólik jergilikti kásipkerlerden jalǵa alyndy. Altai Seidiruly jańa jyldan beri osy kólikti minip júr", - degen oblys ákiminiń baspasóz qyzmetiniń jetekshisi Jarqyn Túsipbekov.
Alaida baspasóz hatshysy kásipkerdiń aty-jónin ataǵysy kelmegen. Al kóliktiń jalǵa alý quny aiyna nebary 50 myń teńge ǵana bolatynyn aitqan.
Almatydaǵy Mercur Auto kompaniiasynyń aqparaty boiynsha, Oralǵa jetkizilgen Audi A8 Long kóligi arnaiy tapsyryspen jasalǵan. Atap aitqanda, onyń ishi sirek aǵashpen aptalyp, qymbat mýltimediialyq júie ornatylǵan. Al artqy oryndaqtary "kapitan kreslosy" atalyp ketken qosymsha oryndyqpen jabdyqtalǵan. Quny - 56 million teńge nemese 169 myń dollar turady.
Sonymen qatar, Oral qalasynda Mercur Auto kompaniiasynyń resmi dileri bolmaǵandyqtan kólik Astrahan nemese Atyraýda jóndeletin bolady.
