Prezident Qasym-Jomart Toqaev sybailas jemqorlyqpen kúreste basymdyq berý qajet salalardy atady, sondai-aq quzyrly organ basshylarynyń jumysy jemqorlyqpen kúres kórsetkishi arqyly da baǵalanatynyn jetkizdi.
Bul týraly Prezident sybailas jemqorlyqqa qarsy is-qimyl máseleleri jónindegi keńeste aitty, dep habarlady Sputnik Qazaqstan agenttigi Aqordanyń resmi saityna silteme jasap.
"Keden, qurylys, bilim berý jáne densaýlyq saqtaý salalaryndaǵy jemqorlyqpen kúresýge basa mán berý kerek. Jaýapty ministrlikter osy baǵyttar boiynsha jemqorlyqty júieli negizde joiý jóninde jospar ázirleýi qajet. Bul jospardy birinshi toqsannyń qorytyndysy boiynsha muqiiat pysyqtap, usynýdy tapsyramyn. Barlyq is-sharany Sybailas jemqorlyqqa qarsy is-qimyl agenttigimen kelisý qajet. Quzyrly organdardaǵy birinshi basshylardyń jumysyn jemqorlyqpen kúres kórsetkishi arqyly da baǵalaityn bolamyn", - dedi Qasym-Jomart Toqaev.
Prezident sybailas jemqorlyqqa qarsy is-qimyldyń barlyq baǵytyn túbegeili qaita qaraýǵa shaqyrdy. Sondai-aq kásipkerler men jurtshylyqtyń sybailas jemqorlyq derekteri boiynsha bergen ótinishteri negizinde júieli jumys júrgizý qajet.
Toqaev memleket belgileitin baǵalardy retteý kezindegi jemqorlyqty túbegeili joiý máselesine de erekshe nazar aýdardy.
"Tiisti ýákiletti organdar baǵany belgilegen kezde onyń qanshalyqty negizdi ekenin muqiiat qaraýy kerek. Munyń astarynda ekonomikalyq sebepten bólek, bireýdiń jymysqy áreketi jatqan joq pa degen saýal týyndaidy. Mysaly, otandyq ónim óndirýshiler temirjol salasyn jemqorlyq jailaǵanyn aityp, únemi shaǵymdanady. Kásipkerler naqty bir nysanǵa aparatyn temirjoldy paidalanǵany úshin tóleitin aqynyń kólemine bailanysty narazylyq bildirýde. Osyǵan orai, bir ýaqytta birneshe óńirden – Qostanai, Shyǵys Qazaqstan, Túrkistan, Aqmola jáne Pavlodar oblystarynan aryz túsken. Monopolist kompaniialar baǵany óz betimen eselep ósirgen", - dedi Memleket basshysy.
Aitýynsha, osyndai áreketter halyq tutynatyn taýarlardyń baǵasyna birden áser etedi.
