Aqtóbelikter baspanasy sýǵa ketken kezde úilerine kirmei, syrttan ketken komissiia múshelerine renishti. Olar arnaiy rezeńke etik daiyndap, baqylaýǵa kelgen adamdardyń jaǵdaiyn jasap qoiǵan, dep habarlaidy QazAqparat tilshisi.
Sý tasqyny kezinde jalǵyz baspanasynan aiyrylǵan aqtóbelikter arnaiy beketterge ornalastyrylyp, jatyn orynmen, tamaqpen, kiimmen qamtamasyz etildi. Biraq el kóńili alań. Olar kúndiz úilerin qaraý úshin baý-baqshany jaǵalaidy. Bári rezeńke etik satyp alǵan. Sebebi, sý basyp, balshyqqa ainalǵan jerge kirý múmkin emes.
«Bizge saiajai dep qyryn qaraidy. Biraq bárimizde jer týraly akti, qujattarymyz bar. Únemi shettetedi. Kóship kelgen kezde jaryǵyn, gazyn júrgizip aldyq. Al biyl jalǵyz baspanamyz sýǵa ketti. Kómek kerek bizge», - dedi Mahambetovka aýylynyń turǵyny Gúlbarshyn Qamysbaeva.
Qazir baspanasyn sý basqan adamdar qaladaǵy jaldamaly páterdiń, bazardaǵy rezeńke etiktiń baǵasy qymbattap ketti dep shaǵym aityp jatyr.
«Úiimizdegi zattardyń jaǵdaiyn bile almai, kúnderimiz uiqysyz ótip jatyr. Jyǵylǵannyń ústine judyryq demekshi, bazardaǵy rezeńke etikter de qymbattady. Buryn 5 myń teńge edi, qazir baǵasy 10 myńǵa kóterildi. Ne degen masqara?», - dedi Aidyn Úsenbaeva.
Eske salsaq, búgin Aqtóbe oblysynyń ákimi Berdibek Saparbaev qaladaǵy sý basqan jerlerdi qarap, úilerdiń jaǵdaiymen tanysty. Keiin baspanasyn sý basqan qarapaiym halyqpen kezdesý úshin mektepterge baryp, jaǵdailaryn bildi.
