Foto: fifg/shutterstock.com
«Otbasy bank» tóraǵasy Lázzat Ibragimova baspana naryǵyndaǵy baǵanyń ózgerisi týraly pikir bildirdi, dep habarlaidy QazAqparat agenttigi.
«Men jyljymaityn múlik naryǵynyń sarapshysy retinde jalpy infliatsiia deńgeii jaǵdaiynda portfeldik investitsiialarmen ainalyspaityn, qundy qaǵazdar naryǵynda jumys istemeitin adamdar salatyn negizgi kapitaldyń túsýi ekitalai dep oilaimyn. Óitkeni infliatsiia azyq-túlik emes taýarlarǵa da áser etip otyr. Sondyqtan biz sarapshy retinde baspana baǵasynyń túsýin kútip otyrǵan joqpyz», - dedi ol Májilistegi otyrystyń aldynda BAQ ókilderiniń saýalyna jaýap bere otyryp.
Onyń sózinshe úi baǵasynyń ári qarai qymbattaýy naryqtaǵy ipotekalyq baǵdarlamalardyń qoljetimdiligine bailanysty bolmaq.
«Qazir bazalyq mólsherleme 16-17 paiyz deńgeiinde ekenin eskersek, «Otbasy banktiń» ol shamadan derbes nesie usynýy tuiyq sheńber bolyp tur. Bul - germaniialyq model boiynsha qurylǵan júie. Biz 20 jyldyń ishinde bazalyq mólsherlemeden derbes, ózgermeitin nesie mólsherlemesin usynyp keldik. Sáikesinshe, bizdiń usynyp otyrǵan kredit ónimimiz boryshkerler úshin eń tiimdi nusqa bolyp otyr. Oǵan degen suranys ta joǵary. Biraq biz bul suranysty adamdardy aqshany kóbirek jinaqtaýǵa baǵyttaý arqyly teńestiremiz. Shilde aiynda biz 2,5 baǵandyq baǵalaý kórsetkishin engizdik. Iaǵni, endi páter satyp alý úshin bastapqy jarnaǵa páter qunynyń 50 paiyzyn jinaqtaý jetkiliksiz. Úsh aidan kem emes ýaqyt boiy aqsha jinaqtap, tiisti sharttardy oryndaý kerek. Kelesi jyly bul baǵalaý kórsetkishin taǵy arttyramyz. Iaǵni, biz óz klientterimizdi birtindep klassikalyq júiege qaitaramyz. Baspanaǵa qajet aqshany adam shyn máninde jinaqtaý kerek bolady. Qalai jinaqtaǵanyna bailanysty boryshkerdiń tólem qabileti týraly baǵalaýdy ózgertemiz. Klient 36 ai boiy bir somany turaqty salyp tursa, ondai adamǵa tólem qabiletin baǵalaǵan kezde borysh alýǵa múmkindik beretin túrli koeffitsent usynýǵa bolady. Demek, strategiia mynandai bolady. Boryshker aqshany neǵurlym tártippen jinaqtasa, bank oǵan soǵurlym jaqsy qarailasady», - deidi bank basshysy.
Lázzat Ibragimova keibir sarapshylardyń «Otbasy bank» turǵyn úi naryǵyna keri áser etip otyrǵany týraly paiymdaryna jaýap berdi.
«Ol basqa bankterdiń tabysyna keri áser etip júrgen shyǵar. Men bul jerde qoǵamnyń múddesin basty baǵdarda ustaýymyz kerek dep oilaimyn. Bizdiń bankke kelip, otbasylyq depozit ashyp, balasyna, ata-anasynyń atyna shot ashatyn adamdar bar. Solardyń múddesin baǵdarǵa alýymyz kerek. Bizden bir zaim alǵan kezde osyndai 3-4 adamnyń depozitin biriktirip jatady. Bul degenińiz otbasylyq koeffitsent qoi. Onyń mólsheri ortasha statistikalyq koeffitsentke sai keledi», - dedi «Otbasy bank» basshysy.
