Bas prokýratýra ákimdikterdiń jaiylym alqaptaryn bólý, aýyl mańyndaǵy jaiylymdardy uzaq merzimge jalǵa berý kezinde zańdy qanshalyqty saqtaǵanyn tekserip jatyr, dep habarlaidy QazAqparat.
Premer-Ministrdiń orynbasary Roman Skliar Májilis ókilderiniń depýtattyq saýalyna bergen jaýabynda osyndai aqpar berdi.
«Memleket basshysynyń tapsyrmasyn oryndaý maqsatynda Bas prokýratýra ákimdikterdiń qyzmetinde jaiylymdyq alqaptardy bólý, onyń ishinde aýyl mańdaryndaǵy jaiylym alqaptardy uzaq merzimge jalǵa berý kezindegi zańdylyqtyń saqtalýyna tekserýler júrgizýde. Bul jumys jyl aiaǵyna deiin júrgiziletin bolady jáne nátijesi boiynsha zańsyz berilgen jer ýchaskilerin qaitarý boiynsha tiisti sheshimder qabyldanady. 2019 jyldyń basynan beri 5,36 mln gektar alqapta paidalanylmaǵan jaiylymdar anyqtaldy. Onyń ishinde 2,31 mln gektar qaita ainalymǵa tartyldy. 1,11 mln gektar memlekettik menshikke qaitaryldy. Al 1,94 mln gektar jaiylymdyq jerdi memleket menshigine qaitarý boiynsha sot protsesteri júrip jatyr», - dedi vitse-Premer.
Ol, sondai-aq, jaiylymdardy basqarý josparynyń ashyqtyǵyn qamtamasyz etý úshin jobalardy internet resýrsyna ornalastyrý qolǵa alynǵanyn eske saldy.
«Josparlardy ázirleý kezindegi kemshilikterdi joiý úshin Aýyl sharýashylyǵy ministrligi Parlament Májilisiniń Agrarlyq komitetimen birlesip, jospardyń pilottyq jobasyn ázirlep, úlgi retinde barlyq oblystar ákimdikterine jiberdi. Osyǵan bailanysty, qabyldanǵan 144 jospar osy úlgilik jobaǵa sáikes qaita pysyqtalynyp qabyldandy», - deidi Roman Skliar.
