Jelide qyrǵyz jazýshysy ári filosof Turysbek Madylbaidyń Ortalyq Aziia halyqtarynyń tarihyna qatysty daýly pikir aitqan suhbaty keń taraldy. Onyń málimdemesi áleýmettik jeli qoldanýshylary arasynda qyzý talqyǵa tústi, dep habarlaidy ult.kz.
Suhbat barysynda ol ejelgi kezeńde bul aimaqta qyrǵyzdar ústemdik etkenin aityp, sol dáýirde ózge etnostardyń róli bolmaǵan degen pikir bildirgen.
Sonymen qatar ol eski tarihi kartalarda qazaq ataýy kezdespeitinin, al qazaq júzderi keibir kóne qujattarda “qyrǵyz ordasy” retinde kórsetilgenin alǵa tartqan.
Madylbai sondai-aq Qazaqstandy Keńes Odaǵy kezeńinde qurylǵan “jasandy memleket” dep sipattap, Qyrǵyz qaǵanaty dáýirlegen ýaqytta qazaq pen ózbek halyqtarynyń izi bolmaǵanyn aitqan.
Bul málimdemeler jeli qoldanýshylary tarapynan keń synǵa ushyrap, kóptegen pikir bildirýshiler ony tarihty burmalaý dep baǵalady. Qoǵamda mundai tujyrymdarǵa qatysty túrli kózqarastar qalyptasyp, qyzý talqylaý jalǵasýda.
