16 mamyrda bankter jeńildetilgen avtonesiege ótinimdi qabyldaýdy bastaidy. Bul týraly QR Úkimet basshysynyń birinshi orynbasary Roman Skliar málim etti, dep habarlaidy QazAqparat.
«Kesheden beri bankter ózderiniń korporativti rásimderin, direktorlar keńesiniń otyrystaryn ótkizip jatyr. Ónerkásipti damytý qory olarmen barlyq qajet kelisimderdi bekitti. Endi olar tiisti rásimderin keiin, dúisenbide nesie bere bastaidy. Bergen ýádelerine qaraǵanda, barlyq jumys dúisenbi kúni iske asyrylady», - dedi Skliar elordada munai-gaz mashina jasaý salasyn damytýǵa arnalǵan forýmda tilshiler saýalyna jaýap bere otyryp.
Onyń sózine qaraǵanda, bul jumystarǵa osyǵan deiin nesieleýdi júrgizgen bes bank jumyldyrylmaq.
«Atap aitqanda, nesie berý baǵdarlamasy qazirgi kezde de jumys istep tur. Revolverlik negizde 88 mlrd teńge bar jáne bul qarajat ainalymda. Bul baǵdarlama boiynsha sońǵy bes jyl boiy tiisti jumystar júrgizilip jatyr. Osy oraida «ÓKM Operatorynan» aýdarylatyn 100 mlrd teńgeni qosamyz», - dedi Úkimet basshysynyń birinshi orynbasary.
Budan buryn habarlanǵandai, jaqynda Indýstriia jáne infraqurylymdyq damý ministri Qaiyrbek Óskenbaev avtonesie sharttary bekitilgenin aitqan edi.
Jeńil avtomobilderdi satyp alýǵa nesie berý kelesi sharttar boiynsha júzege asyrylady:
• syiaqy mólsherlemesi – 4%;
• nesielendirý somasy – 10 mln teńgeden artyq emes;
• qarjylandyrý merzimi – 7 jyldan artyq emes;
• bastapqy jarna – 0 %-dan bastap;
• kólik quralynyń quny – 15 mln teńgeden aspaidy.
Avtonesieni ekinshi deńgeidegi bankter beredi.
