Akter Erkebulan Daiyrov «Balýan Sholaq» filminde kúresker tulǵany somdaýǵa qandai daiyndyqpen kelgenin aityp berdi, dep habarlaidy QazAqparat.
«Jalpy aitar bolsaq, bul kino bizge ne úshin kerek? Kino - ideologiialyq saiasattyń úlken bir qarýy, ulttyq rýhaniiatty alty qurlyqqa pash etetin jaqsy qural. Bizdiń soǵan quqymyz bar. Jaǵdaiymyz da jetedi. Qudai qalasa, biraz kúnnen keiin «Balýan Sholaq» filmimen Alty Alash qaýyshatyn bolady. Rejisser Nurgeldi Sadyǵulov aityp ótkendei, Balýan Sholaqty kóp jastar tanymaidy. Tek astynda «KFS» satatyn Balýan Sholaq sport kesheni dep qana biledi. Al shyndyǵynda, bul batyr bireýdi boz kilemde jyqqanymen emes, eldiń namysyn, qazaq óneriniń júgin arqalap, atadan balaǵa miras bolǵan úlken mýzykalyq qundylyq qaldyrǵan arda azamat ekenin biri bilse, biri bilmeidi. Sondyqtan, Balýan Sholaq týraly tek sport nemese ónerdiń tóńireginde júrgen adamnyń bilýi shart emes. Buny jalpy halyq bilýi kerek», - deidi akter.
Erkebulan Daiyrovtyń aitýyna qaraǵanda, kastingten ótkennen keiin oǵan «bir jylqyny bir óziń jeýiń kerek» degen talap qoiylǵan.
«Salmaq qosý kerek dedi. Ýaqyt óte qysqa - 2 ai ǵana qalǵan. Bir aidyń ishinde 15 keli salmaq qostyq. Syrt kelbeti - faktýrany barynsha uqsatýǵa tyrystyq. Kúnde sportpen ainalysyp, arnaiy jattyqtyrýshydan sabaq aldyq. Osynyń bári ońai dúnie emes. Balýan Sholaqty halqymen qaýyshtyrý úshin qandai akter bolsyn, barynsha tyrysar edi. Al qalǵan qiyndyqtar elge mańyzdy emes, ózime ǵana qatysty dúnie. Taǵy da qosa keteiin: Balýan Sholaqtyń ómiriniń árbir sáti - tarihqa toly. Kenen atamyzben kezdesip, biraz ánderin úiretip ketken. Onyń ózi 45 minýttyq kino bolar edi. Sondyqtan, bul kinoda róldi qoldan kelgenshe sátti alyp shyǵýǵa tyrystyq. Balýan Sholaq - istiń adamy. El basyna kún týǵanda etigimen sý keshken naǵyz er azamat. Sol sebepti, Balýan Sholaqtyń kúresker bolǵanyn barynsha kórsetýge tyrystyq», - deidi akter.
