Balqash qalasy úshin Metallýrg kúni – basty kásibi merekelerdiń biri. Búginde salada qalanyń alty myńnan astam turǵyny eńbek etedi. Olardyń kópshiligi atadan balaǵa jalǵasqan eńbek áýletteriniń izbasarlary. 2026 jyldyń alǵashqy jartyjyldyǵynyń qorytyndysy boiynsha Balqash mys balqytý zaýytynda 96 myń tonnadan astam katodty mys óndirildi.
Kásibi merekege orai qalada sala eńbekkerlerin saltanatty marapattaý rásimi ótti. Úzdik metallýrgterge vedomstvolyq jáne memlekettik nagradalar tabystaldy.
– Qazaqstan Prezidenti Qasym-Jomart Toqaev: «Eńbek adamy qoǵamda erekshe qurmetke ie bolýy tiis», – dep birneshe ret atap ótken bolatyn. Bul sózdiń sizderge tikelei qatysy bar. Sizderdiń qajyrly eńbekterińizdiń arqasynda Qaraǵandy oblysyndaǵy metallýrgiia salasy Qazaqstan ekonomikasynyń negizgi tireginiń biri bolyp qala beredi. Ótken jyly óńirdegi ónerkásip óndirisiniń kólemi 5,3 trln teńgeden asty, onyń shamamen 3,8 trln teńgesi óńdeý ónerkásibiniń úlesine tiesili, – dedi Qaraǵandy oblysynyń ákimi Ermaǵanbet Bólekpaev sala mamandaryn kásibi merekesimen quttyqtaý sózinde. – Búginde sala kásiporyndary bolashaqqa senimmen qadam basyp keledi. Zamanaýi tehnologiialar engizilip, ekologiialyq standart kúsheitilýde, jańa óndiristik jobalar júzege asyrylýda. Degenmen salanyń eń basty qundylyǵy – adam bolyp qala beredi. Sizderdiń bilimińiz, kásibi sheberlikterińiz ben jaýapkershilikterińiz metallýrgiia salasynyń turaqty damýyna serpin berýde.
Óńir basshysy metallýrgiia salasynyń damýyna eńbek áýletteriniń qosyp otyrǵan úlesin erekshe atap ótti. Sonyń ishinde birneshe býyny osy salada tabysty eńbek etip kele jatqan, ókilderiniń jiyntyq eńbek ótili júz jyldan asqan Aqbergenovter áýletin úlgi retinde keltirdi.
Saltanatty shara barysynda Ermaǵanbet Bólekpaev úzdik jumyskerlerge «Eńbek Dańqy», «Qurmetti metallýrg» tósbelgileri men «Eńbek ardageri» medaldaryn tabystady.
«Qazaqmys korporatsiiasy» JShS Basqarma tóraǵasy Rýslan Óskenáli metallýrgter eńbeginiń mańyzy men Balqash óndiristik alańynyń keleshegi týraly sóz qozǵady. Ol kompaniia qabyldaityn árbir sheshimniń negizinde adam, onyń densaýlyǵy men qaýipsizdigi basty orynda turatynyn atap ótti.
– 2026 jyldyń birinshi jartysynda Balqash mys balqytý zaýyty 96 myń tonnadan astam katodty mys shyǵardy. Bul kórsetkish – sizderdiń kúndelikti tynymsyz eńbekterińiz ben kásibi sheberlikterińizdiń naqty nátijesi. Biz óndiristik infraqurylymdy kezeń-kezeńimen jańartý, jabdyqty jańǵyrtý, eńbekkerlerdiń turmystyq jaǵdaiyn jaqsartý, sondai-aq meditsinalyq jáne áleýmettik baǵdarlamalardy damytý baǵytyndaǵy jumysty júieli túrde jalǵastyryp kelemiz. Biyl Balqash mys balqytý zaýytynda aýqymdy kúrdeli jóndeý baǵdarlamasy iske asyrylyp jatyr. PV-1 jáne PV-2 balqytý agregattaryna kúrdeli jóndeý jumysy júrgizilýde. Ǵimarattardyń shatyr jabyny jańartylyp, nóser kárizi júiesi aýystyrylýda. Sonymen qatar kásiporynnyń tehnikalyq jaraqtandyrylýy kúsheitilip, aýa baptaý júieleri ornatylýda. Jyl sońyna deiin Balqash óndiristik alańyna jalpy quny 166 mln teńgeden asatyn eki zamanaýi jedel meditsinalyq járdem kóligi satyp alynady. Odan bólek «Gigiena» korporativtik baǵdarlamasy aiasynda 2026 jyly áleýmettik-turmystyq maqsattaǵy 24 nysandy jańǵyrtý josparlanyp otyr. Bul jumysqa 754 mln teńge baǵyttaldy, – dedi Rýslan Óskenáli.
Óndiristiń turaqty damýy kompaniianyń ózine qatysy bar óńirlerdegi ómir súrý sapasyn jaqsartýmen qatar júredi. Bul týraly «Qazaqmys korporatsiiasy» JShS Baqylaý keńesiniń tóraǵasy Nurmuhambet Ábdibekov óz sózinde toqtaldy.
Ol kompaniianyń investitsiiany tek kásiporyndardy jańǵyrtýǵa ǵana emes, sonymen qatar qalalyq infraqurylymdy, bilim berý, densaýlyq saqtaý, mádeniet jáne sport salalaryn damytýǵa da baǵyttap otyrǵanyn atap ótti.
