Smartfon balalar men jasóspirimderdiń kúndelikti ómirinde keń qoldanylatyn quralǵa ainaldy. Biraq telefondy baqylaýsyz ári uzaq paidalaný olardyń uiqysyna, oqýyna jáne jaqyndarymen qarym-qatynasyna keri áser etýi múmkin, dep habarlaidy ult.kz.
Mamandardyń pikirinshe, mundai ádet ásirese jasóspirim shaqta ońai qalyptasady.
The Conversation basylymy keltirgen derekterge súiensek, jasóspirimderdiń ózin-ózi baqylaýǵa, josparlaýǵa jáne áreketiniń saldaryn baǵalaýǵa jaýap beretin mi bólikteri áli de damý ústinde bolady.
Sol sebepti áleýmettik jelidegi jańa habarlama, laik nemese pikir sekildi jedel keri bailanys olardyń nazaryn jii aýdarady.
Qandai belgilerge mán berý kerek?
Malim.kz basylymynyń jazýynsha, eger bala telefonyn jii tekserip, bos ýaqytyn gadjetsiz ótkize almasa, bul smartfonǵa shamadan tys áýestenýdiń belgisi bolýy múmkin.
Sondai-aq jaqyndarymen sóilesýge qyzyǵýshylyqtyń tómendeýi, sabaqty keiinge qaldyrý, basqa mańyzdy isterge kóńil bólmeý jáne túnge deiin telefon qaraý da nazar aýdarýdy qajet etedi.
Uiqynyń buzylýy saldarynan bala kúndiz ózin álsiz sezinip, tez sharshaýy múmkin.
Nelikten telefondy qaita-qaita teksergisi keledi?
Zertteýshiler muny kútpegen marapat mehanizmimen bailanystyrady.
Adam ár jańa habarlama nemese eskertý kelgen saiyn qysqa ýaqytqa jaǵymdy emotsiia sezinedi. Mundai áser qaitalana bergende mi telefondy jii tekserýge beiimdeledi.
Ýaqyt óte kele smartfondy qolǵa alý sanaly áreketten góri avtomatty ádetke ainalýy múmkin.
Ata-analarǵa qandai keńes beriledi?
Mamandar balaǵa shekteý qoiýmen qatar, ata-ananyń ózi de smartfon qoldaný ádebin saqtaýy mańyzdy ekenin aitady.
Mysaly, otbasylyq dastarqan basynda telefondy paidalanbaý, uiyqtar aldynda gadjetti shetke qoiý jáne búkil otbasyǵa ortaq ereje belgileý paidaly bolýy múmkin.
Balaǵa tek «telefondy qoi» deýden góri, onyń ornyna basqa is usyný da mańyzdy. Sport, serýen, kitap oqý, shyǵarmashylyq nemese otbasymen birge ýaqyt ótkizý smartfonǵa ketetin ýaqytty azaitýǵa kómektesedi.
Sarapshylardyń aitýynsha, eń tiimdi tásil – balanyń gadjetti tolyq tastaýyn talap etý emes, ony sanaly ári shekteýli paidalanýǵa úiretý.
