Sońǵy ailarda jarqyn bolashaqqa umtylǵan mektep oqýshylarynda júkteme kóp. Bireýleri Nazarbaev intellektýaldyq mektebine iriktelýden óttse, mektep túlekteri UBT tapsyrdy. Áleýmettik jelide joǵarǵy ball jinap qýanyp jatqan da, irikteýden óte almai saǵy synyp jatqan da balalardyń videosy tarady.
Kei ata-ana balasynyń jarqyn bolashaq kepilin NIM siiaqty mekteptermen bailanystyryp, balany kóp jyl arnaiy daiyndaidy. UBT-dan qajet ballyn jinap, grant utý kei ata-ana úshin otbasynyń materialdyq júgin jeńildetýdiń negizgi amaly dep qarastyrylady. Árine bul jerde ata-ananyń da, balanyń da kópjylǵy eńbegi, talaby bar.
Sonymen birge kópjylǵy qysym, baqylaýdy da joqqa shyǵara almaimyz. Mundaida myqty kórsetkishterdi talap etetin ata-ana balaǵa mahabbatty jetistikterine sai berip otyrady. Jetistik pen myqty kórsetkishter otbasynyń jalǵyz qundylyǵy bolyp, bala únemi ishki qysymda ómir súredi, óz qalaýyn aitýdan qalady.
Endi bir ata-ana "balam baqytty bolsa boldy, óz jolyn tabady" dep onyń bolashaǵyna qatysty jaǵdailardy eleýsiz qaldyrady. Balanyń óz qalaýyn tanýy, ata-anamen qabyldanýy, qatelik jasaýdan qoryqpaýy – bári jaqsy. Biraq qajet sátterde ata-ananyń baqylaýynsyz qalatyn bala shek pen shekarany ajyrata almai, jaýapkershilik degendi bilmei ósýi múmkin.
Abzalynda
Bala tárbiesinde, onyń bilimine, bolashaǵyna qatysty sátterde balans, árqaisyna jeke yńǵai kerek. Kei ata-ana "baqytty bala baqylaýsyz bolýy kerek" dep túsinedi. Biraq balanyń ómirinde tártiptiń, jaýapkershiliktiń, báseke ortasynyń bolýy ol – baqytsyz ósip jatyr degendi bildirmeidi.
Kei ata-ana balany únemi baqylaýda ustaimyn dep, ony jylýlyqtan, mahabbattan aiyrady. Biraq balany kez kelgen nátijesimen qabyldaý, balanyń da daýysyn tyńdaý eń aldymen óziniń adam, perzent retinde qundy ekenin kórseter edi.
Eń bastysy kórsetkish – ne qazir sizdiń janyńyzda baqytty, ne árdaiym jeńimpaz bala emes, bolashaqta ata-anasy janynda bolmasa da ózin ózi jigerlindire alatyn, qulasa da qaita aiaqqa tura alatyn ishki tiregi myqty perzent tárbieleý ekendigin esten shyǵarmaiyq.
Dinara Bolat
