Pavlodar turǵyny jedel járdem qyzmetkerleri aýrýhanaǵa barar jolda onyń bir jasar balasyn jaraqattap alǵanyn aitady. Aitýynsha, balanyń qabyrǵasy synǵan. Densaýlyq saqtaý basqarmasy oqiǵanyń mán-jaiyn anyqtap jatyr, - dep habarlaidy Tengrinews.kz tilshisi.
Pavlodarlyq áiel jantúrshigerlik oqiǵa týraly Instagram-da jazdy. Áiel 6 sáýir kúni saǵat 21:03-te jedel járdem shaqyrǵan. Dárigerler kelgenshe náreste birneshe márte esinen tanyp qalǵan. Áiel dárigerlerdiń tez jetkenin, alaida alǵashqy kómek kórsetýge daiyn emestikterin aitady.
"Olar ottegisiz kelgen, sodan keiin alǵashqy kómek kórsetý úshin kerekti qurylǵylaryn alýǵa taǵy úsh ret kólikke bardy. Osy kezde joǵalǵan ýaqytty aitsańyzshy. Nátijesinde, meniń bir jasar balama alǵashqy kómek kórsetip, qabyrǵasyn syndyrdy, bul bergi jaǵy. Aýrýhanaǵa barar jolda balany baspen qulatty. Qazir balam aýyr jaǵdaida reanimatsiiada jatyr. Jedel járdem brigadasynyń nemquraidylyǵyna qatysty sharalar qabyldańyz", - dep jazdy avtor.
Áieldiń týystarynyń aitýynsha, sol kúni jedel járdem balaǵa eki ret kelgen.
"Alǵash ret túski ýaqytta shaqyryldy, ol kezde balanyń ustamasy bolmady. Onyń ystyǵy kóterilip turdy, ápkem onyń júregin, ókpesin tyńdaýdy ótindi. Jedel járdem dárigerleri ókpesi taza ekenin, tis shyǵyp jatqandyqtan mazasyzdanyp, ystyǵy kóterilip jatqanyn aitty. Qazir balada pnevmoniia, iaǵni jedel járdem muny bilmegen, taǵy bir nemquraidylyq. Eger ápkem balada pnevmoniia ekenin bilgende aýrýhanaǵa erte baratyn edi. Sondai-aq, jolda jedel járdem dárigerleri balany temir edenge basymen qulatqan", - dedi áieldiń týysy.
Aita keteiik, oblystyq jedel járdem stantsiiasynda zardap shekken balanyń qabyrǵasy synbaǵanyn aitqan. Alaida keiinirek jaraqat bar, qabyrǵasy synǵany anyqtalǵan.
"Balany qabyldaǵan aýrýhana rentgenge túsirgende balanyń qabyrǵasy synbaǵanyn, bári jaqsy ekenin aitqan. Qazir biz qabyrǵasy synǵanyn bilip otyrmyz. Bunyń qalai bolǵanyn anyqtaimyz", - dedi dárigerler.
Pavlodar oblysynyń Densaýlyq saqtaý basqarmasy da sábidiń qabyrǵasy synǵanyn rastady.
"2021 jyly týylǵan bala qazirgi ýaqytta oblystyq balalar aýrýhanasynyń jansaqtaý bóliminde jatyr. Diagnozy eki jaqty polisegmentaldy pnevmoniia. Sonymen qatar, tserebraldy sal aýrýy, psihomotorlyq damýdyń keshigýi, simptomatikalyq epilepsiia, konvýlsiialyq sindrom bar. Sondai-aq, segizinshi qabyrǵasy synǵan. Atalǵan fakt boiynsha qyzmettik tergeý júrgizilýde", - dep túsindirdi vedomstvoda.
