QR Premer-Ministri Baqytjan Saǵyntaev Mańǵystaý oblysyna jumys sapary aiasynda «Atameken» UKP óńirlik keńesiniń múshelerimen kezdesý ótkizdi, dep habarlaidy "Ult aqparat" primeminister.kz saityna silteme jasap.
Onda shara qatysýshylary memlekettik-jekeshelik áriptestikti damytý, nesie resýrstarynyń qoljetimdiligin arttyrý, týristik salaǵa qoldaý kórsetýdiń memlekettik baǵdarlamasyn ázirleý, sondai-aq, óńirde aýyl sharýashylyǵyn damytý úshin sýarýǵa arnalǵan sýmen qamtamasyz etý máselelerin talqylady.
Óńirdiń biznes qaýymdastyǵy tarapynan Óńirlik keńestiń tóraǵasy, «Zapkaztranzit» AQ direktorlar keńesiniń tóraǵasy Jańabai Súiindikov, «Qazteńiztransflot» kompaniiasynyń bas direktory Marat Ormanov, Mańǵystaý oblysy Týrizm qaýymdastyǵynyń tóraǵasy, «Kaspii holding» JShS direktory Viktor Koh, «Agrorost» fermerler qaýymdastyǵynyń tóraiymy Nursáýle Jienbaeva, «Zaman jáne K» JShS jáne «Saliýt jáne K» JShS direktory Hajeden Izmailov, «Aqtaý halyqaralyq áýejaiy» AQ atqarýshy direktory Erǵazy Joldasov, «Kezbi» JShS direktory Bitim Kezbaev, «deSali design territory studio» JShS jáne «Coffee&People» JShS direktory Sáýle Salyhova jáne «QazAzot» AQ «Shaǵyrly-Shómishti» bólimshesiniń direktory Abzal Meńdibaev sóz sóiledi.
QR mádeniet jáne sport ministri Arystanbek Muhamediuly, QR investitsiialar jáne damý ministri Jeńis Qasymbek kóterilgen máselelerge qatysty túsinikteme berip ótti.
Baqytjan Saǵyntaev QR Úkimeti elimizdiń biznes ahýalyn jaqsartyp, otandyq biznesti damytý úshin qolaily jaǵdailar jasaý jolynda júieli negizde jumystar júrgizip jatqanyn atap ótti. Biznesti qaita retteý boiynsha belsendi sharalar qabyldanyp jatyr, búginde bizneske ruqsat qujattamasynyń sany shamamen úsh esege qysqartyldy.
Sondai-aq, túrli eseptemeler men málimdemelerdiń, negizsiz salyq tekserýleriniń sanyn qysqartý boiynsha jumystar jalǵastyrylyp jatyr. Budan ózge, biznestiń memlekettik satyp alýlarǵa jáne kvazimemlekettik sektor satyp alýlaryna qoljetimdiligin arttyrý boiynsha kólemdi jumystar júrgizildi, elimizdiń árbir júie quraýshy kásiporny boiynsha jergilikti qamtý kólemin ulǵaitýdyń maqsatty indikatorlaryn ornatý jumystary bastaý aldy.
Qarjylyq qoldaý kórsetý sharalary týraly aitar bolsaq, qazirgi tańda memleket Ónimdi jumyspen qamtý jáne jappai kásipkerlikti damytý baǵdarlamasyn iske asyryp jatyr, onyń aiasynda tiimdi mólsherleme boiynsha 18 mln teńgege deiin shaǵyn nesieler beriledi.
Úkimettiń otandyq biznesti damytý boiynsha keshendi jumysy odan ári jalǵasyn tappaq, sebebi, Memleket basshysynyń tapsyrmalaryna sáikes JIÓ-niń jalpy kólemindegi ShOB-tiń úlesi 2050 jylǵa qarai 50%-dan kem bolmaýy tiis.
.jpeg)