Saýda jáne integratsiia ministri Baqyt Sultanov aimaqtardaǵy turaqtandyrý qorlarynyń jumysy boiynsha jergilikti atqarýshy organdardyń jaýapkershiligi byltyrdan qaraǵanda salmaqty bolatynyn eske saldy, dep habarlaidy QazAqparat.
«Aimaqtardaǵy turaqtandyrý qorlary týraly aitar bolsaq, jergilikti atqarýshy organdar taýsylýy múmkin azyq-túlik túrleri boiynsha máseleni ýaqtyly sheshýi tiis. Jergilikti atqarýshy organdar bul rette azyq-túlik túrlerine taldaý jasaýy kerek. Qajettiligi joǵyn satyp alýdyń keregi joq. Aýyl sharýashylyǵy ministri aitqandai, kei kezde óndiris pen suranystyń ara-jigi uzaryp ketedi», - dedi Baqyt Sultanov OKQ-da ótken baspasóz máslihatynda.
Onyń aitýynsha, byltyr qaraqumyq tapshylyǵy týyndap, keibir óńirdiń biligi naryqtaǵy bul trendter men ózgeristerdi baiqamai qalǵan.
«Turaqtandyrý qorlary boiynsha jergilikti atqarýshy organdar jumys júrgizýde. Bul rette olarda jaýapkershilik bar. Byltyr toǵyz aidyń qorytyndysy boiynsha alty óńirde bul máseleni jetkilikti deńgeide baqylaýǵa almaǵan ákimderdiń orynbasarlary jazalanǵan edi. Biyl jaýapkershilik júgi odan da salmaqty», - dedi ol.
Eske sala ketsek, buǵan deiin atalmysh baspasóz máslihatynda Baqyt Sultanov koronavirýs infektsiiasyna bailanysty sýpermarketter men bazarlarda týyndaǵan dúrbeleńge bailanysty qazaqstandyqtardy sabyrǵa shaqyrǵan bolatyn.
