2026 jylǵy 16 tamyzdan bastap Úlken Almaty ainalma avtomobil jolynda (BAKAD) jol júrý aqysyn tóleýdiń jańa tártibi kúshine enedi. Ózgerister Qazaqstan Respýblikasy Kólik ministrliginiń buiryǵymen bekitildi, dep habarlaidy ult.kz.
Jańa tártipke sáikes, jol júrý aqysyn ýaqytyly tóleitin júrgizýshiler úshin tarif burynǵy deńgeide saqtalady. Kólik quralynyń sanatyna qarai jol aqysy 0,07 AEK-ten (302,75 teńge) 0,22 AEK-ke (951,5 teńge) deiin bolady.
Al jol aqysy tirkelgen kúnnen keiin jeti jumys kúni ishinde tólenbegen jaǵdaida negizgi tarif qoldanylady. Bul rette tólem mólsheri kólik sanatyna qarai 0,14 AEK-ten (605,5 teńge) 0,44 AEK-ke (1903 teńge) deiin ósedi.
Kólik ministrliginiń málimetinshe, engizilgen ózgerister jol júrý aqysyn ýaqytyly tóleýdi yntalandyrýǵa baǵyttalǵan jáne tólemdi merziminde júrgizetin paidalanýshylarǵa qosymsha qarjylyq júkteme ákelmeidi.
Sonymen qatar jol júrý aqysyn esepteý tártibi ózgerissiz qalady. Burynǵydai tólem kólik quralynyń sanatyna jáne aqyly jol ýchaskesinde bir saǵatqa deiin bolýyna qarai esepteledi. Júrip ótken qashyqtyq jol aqysynyń mólsherine áser etpeidi.
Sondai-aq Almaty oblysynyń Talǵar, Qarasai jáne Ile aýdandarynyń turǵyndaryna arnalǵan qoldanystaǵy jeńildikter saqtalady. Olar úshin ailyq jáne jyldyq abonementterdiń quny ózgerissiz qalady.
Jańa erejeler resmi jariialanǵannan keiin kúntizbelik on kún ótken soń, iaǵni 2026 jylǵy 16 tamyzdan bastap kúshine enedi.
