QR Aqparat jáne qoǵamdyq damý ministri Darhan Qydyráli AstanaMediaWeek dástúrli halyqaralyq forýmynda Qazaqstanda mediasaýattylyqty arttyrýǵa arnalǵan mektepter ashylatynyn aitty, dep habarlaidy QazAqparat.
«Feikniýsti aýditoriiany senimdi aqparatty tani bilýge mashyqtandyrý arqyly ǵana azaita alamyz dep oilaimyn. Osyndai kezde oiymyzǵa dezinformatsiiamen kúresýdiń bir joly retinde aýditoriiany jalǵan men shyn aqparattyń ara jigin ajyratýǵa úiretý, iaǵni mediasaýattylyq uǵymyn ulǵaitý durys dep sanaimyz. Jeke media, infliýser ne redaktsiialar sóz jaýapkershiligin, aqparattyń aldyndaǵy, onyń saldarynan bolatyn salmaqty sezinýge tiis. Bul oraida salaǵa jaýapty ministrlik retinde media mektepterin ashý, onyń ishinde mediasaýattylyq boiynsha bilim berý – bizdiń tikelei mindetimiz», - dedi Darhan Qydyráli.
Aitýynsha, atalǵan baǵytta birlesip qolǵa alatyn birqatar is-shara bar.
«Faktcheking, aqparatty saralaý, onyń shyǵý tórkinin tekserý, taratpas buryn belgilengen kriterilerden ótkizý sekildi birneshe satydan turatyn oqytý júiesin uiymdastyrýymyz kerek. Bul oraida jýyrda jańarýy kózdelip otyrǵan massmedia týraly zań jobasynda birshama jańashyldyq bolmaqshy. Aqparatqa qol jetkizý, jýrnalisterdiń mártebesin kóterý, kásibi quzyretin arttyrý sekildi birshama ózgeristerdi josparlap otyrmyz», - dedi ministr.
