Qazaqstan KazSat geostatsionarly spýtnik jelelerinen bas tartyp, tómen orbitaly spýtniktik tehnologiialarǵa basymdyq bermekshi, dep habarlaidy QazAqparat.
Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin atalmysh sheshimniń túpki mánin bylai dep túsindirdi.
«Bizde KazSat-1 jáne KazSat-2 degen eki spýtnik bar. 2024 jyly KazSat-2 qoldanystan shyǵady. Baiaǵydan beri osy merzimde ony jańa spýtnikpen almastyrý josparlanǵan bolatyn. Biraq, qazir Starlink, One Web siiaqty tómen orbitaly spýtnikterdiń tehnologiiasy damyǵandyqtan, zaman talabyna beiimdelýdi oilastyryp jatyrmyz. Bir jyl buryn ǵana bul tehnologiialar synaqtan ótpegen bolsa, qazir qoldanysqa engizilip jatyr. Sondyqtan biz kerisinshe atalmysh óndiris oryndarymen áriptestikke jol ashyp jatyrmyz. Baǵana aitqan 1200 aýylǵa sapaly internet jetkizý úshin Starlink, One Web, SES óndirýshilerimen qatar kelissóz júrgizip jatyrmyz. Atalmysh aýyldarǵa internet jetkizýdiń basqa joly joq bolǵandyqtan, osy zamanaýi spýtnik tehnologiialaryn paidalanýymyz kerek», - deidi ministr.
Onyń sózine qaraǵanda qazir elimiz qoldanyp otyrǵan KazSat geostatsionarly spýtnikterdiń múmkindigi tómen orbitaly spýtnikterdiń shalymyna da ilespei qalǵan.
«Men KazSat-2-ni almastyratyn KazSat-2R jobasyn budan bylai qarastyrmaýdy usynǵan bolatynmyn. Álemde jańa tehnologiialar paida bolyp jatqanda geostatsionarlyq spýtnikter olardyń beretin jyldamdyǵyn bere almaidy. KazSat-2 qazir sekýndyna 8 Mbit internet bere alady. Al tómen orbitaly spýtnikter 1 Gbit-ke deiin jyldamdyq beredi. Ekeýin salystyrýǵa da kelmeidi. Biz ýaqyty ótip bara jatqan tehnologiialarǵa aqsha salmaýymyz kerek. Kerisinshe zamanýi tehnologiia jasaýshylarmen áriptestiktiń jolyn izdeitin bolamyz», - dedi Baǵdat Mýsin.
Eske salsaq, budan bylai HQO qyzmetkerleri derbes derekterge arnaiy kodpen ǵana kiretin boldy.
