Qazaqstan Prezidentiniń keńesshisi Baǵdat Mýsin Qazaqstanda aldaǵy ýaqytta tsifrlyq bilim berý júiesin damytýǵa qatysty óziniń paiym-pikirimen bólisti, dep habarlaidy QazAqparat.
«Strategiialyq turǵyda qaraityn bolsaq, kásipkerlermen seriktestik – eń durys jol. Qazir keibir tsifrlyq bilim berý resýrstary aitarlyqtai deńgeide qurylymdalǵanyn kórip otyrmyz. Al keibir resýrs tek videosabaqtardy túsirip jatyr. Meniń oiymsha videosabaq – sabaqty túsindirýdiń eń jaman formaty. Álbette ýaqyt bolǵanda qamdanyp alar edik. Bizge videosabaqty ázirleýdiń keregi joq, sózsiz. Bizge túbirimen oqý baǵdarlamasynyń ózin qaita qarap, tsifrlyq resýrstar bilim berý protsesin qanshalyqty jeńildetetinin túsinip alǵan abzal. Bárimiz nege Zoom-ǵa lap qoidyq. Óitkeni muǵalim onyń kómegimen buryn qalai sabaq berip júrdi, solai jalǵasar dedik. Sebebi menińshe, endigi muǵalimder sabaq bermeidi, olar aldaǵy ýaqytta kontent daiyndaidy», - dedi ol qashyqtan oqytý tehnologiialaryn qoldanýdyń problemalary talqylanǵan onlain rejimdegi kezdesýde.
Prezident keńesshisiniń aitýynsha, Netflix-te qazirgi tańda kórermen kino túgili, stsenariidi ózi tańdai alatyndai jaǵdai jasalǵan. Kinonyń basty keiipkeri sońynda óle me, joq pa – atalmysh internet alańy osyndai tańdaý quqyǵyn daiyndap ta qoiǵan.
«Tsifrlyq kontentte de solai. Máselen tsifrlyq bilim berý kezinde Ekinshi dúniejúzilik soǵys qashan bastaldy dep muǵalim suraq qoiǵanda oqýshy «1939, 1940, 1941, 1942, 1943» degen birneshe nusqanyń ishinde durysyn tańdap alýy tiis. Oqýshy jaýapty belgilengennen keiin muǵalimniń kontenti onyń jaýabyn taldap, nelikten durys nemese qate ekenin túsindirýi kerek. Iaǵni bul ádistiń ózi - jańasha oilaý. Biz tsifrlyq formatta qazir qozǵaýshy adamdardy daiyndai bilýimiz kerek. Qazir bizge oqýlyq jazyp júrgen adamdar ol sanatqa jatpaidy. Bir kezde «Atamura», «Almaty-kitap» sekildi baspalardy ashqandai qazir tsifrlyq bilim berý resýrstaryn jolǵa qoia alatyn jeke kásipkerlerdiń shoǵyryn qalyptastyrýymyz kerek», - dedi ol.
Baǵdat Mýsinniń aitýynsha qazirgi videosabaqpen tálim berip, keiin test alý júiesi qazir jaramdy bolyp turǵanymen, keiin ýaqyt talabyna múlde jaýap bere almai qalady.
