Oblystyq máslihattyń depýtaty Talǵat Salfikovtyń el Táýelsizdiginiń 25 jyldyǵyna orai ózi basshylyq etetin «Anvar» JShS-na qatysty sýpermarketterde áleýmettik mańyzy bar 20 taýardyń baǵasyn jańa jylǵa deiin kótermeý týraly bastamasyn aqtóbelik kásipkerler biraýyzdan qoldady. Biznestegi tabystaryn Táýelsizdiktiń 25 jyldyǵymen bailanystyratyn aqtóbelik kásipkerler osy jyldar ishinde óz isteriniń aiaqtan tik turyp ketýine memleketten meilinshe qoldaý bolǵanyn, ásirese, Elbasy Nursultan Nazarbaevtyń syndarly saiasatynyń arqasynda jemisti nátijelerge qol jetkizip júrgenderin aiqyn sezinetindikterin kórsetti. Qazir aimaqtaǵy 115-ke jýyq mádeni, sporttyq nysandar men bazarlar, saýda úileriniń basshylary osy aktsiiaǵa qatysýda. Ásirese, bul aktsiia halyqtyń áleýmettik jaǵynan az qamtylǵan toptaryn, zeinetkerlerdi qoldaý maqsatynda jasalyp otyrǵanyn olar bek túsinedi.
Biz Táýelsizdik merekesi qurmetine aqtóbelikterge tartý retinde azyq-túlik baǵasymen qosa ózge de taýarlardyń baǵasyna jeńildik berýge bastama kótergen depýtat Talǵat Salfikovtyń ieligindegi «Anvar» sýpermarketinde boldyq. «Anvar» JShS direktory Baqytjan Kizaev saýda núktesinde áleýmettik mańyzy bar 20 taýardyń baǵasy 1 qańtarǵa deiin kóterilmeitinin aitty. Rasynda da, sórelerge jinalǵan azyq-túliktermen qosa, sharýashylyq buiymdaryna jeńildetilgen baǵa qoiylǵan. Kásipkerler tarapynan baǵaǵa jeńildikter jasalǵaly saýda núktelerine kelýshilerdiń sany burynǵydan 20 paiyzǵa artqan. Mereke kúnderi satyp alýshylardyń qatary budan da kóbeiedi dep kútilýde. Munda da 300-den astam túrli taýar baǵasyna 20-40 paiyz aralyǵynda jeńildikter jasalǵan. Seriktestik basshysy baǵany ósirmeý týraly sheshim men jeńildikter el Táýelsizdiginiń 25 jyldyq mereitoiyn merekeleýge qosqan úlesteri ekenin, bul bastama aqtóbelikterdiń kóńil kúiin kóterý, qarajattaryn únemdep, merekeni sezinýine yqpal etý maqsatynda jasalyp otyrǵanyn atap ótti.
Baǵaly bastamany qyzý qoldaǵan «Dina» gipermarketiniń basshylary da óz tarapynan birqatar jeńildikter qarastyrǵan eken. «Dina» gipermarketiniń direktory Ainagúl Nazarbaevanyń aitýynsha, jyl sońyna deiin áleýmettik mańyzǵa ie 33 túrli azyq-túliktiń 20 túri boiynsha baǵa turaqtandyrylady. Sondai-aq, munymen qosa otandyq jáne sheteldik 500-ge jýyq taýar baǵasyna 20-50 paiyz aralyǵynda jeńildikter jasalyp otyr.
Aqtóbelikter arzandatylǵan baǵamen turǵan taýarlardy 1 qarashadan bastap satyp alýda. Bul aktsiia keler jyldyń 15 qańtaryna deiin jalǵasady. «Biz el Táýelsizdiginiń 25 jyldyǵyna tek taýarlarǵa baǵany tómendetýmen ǵana shektelmei, merekeni laiyqty qarsy alý úshin eki iri jobamyzdy iske asyrǵaly otyrmyz. Onyń biri – kólik-logistikalyq ortalyq. Bul keshen 16 jeltoqsan kúni saltanatty jaǵdaida ashylady. Ekinshi joba — «Sheber» qurylys gipermarketi. Bul nysan Qazaqstan Respblikasynyń Tuńǵysh Prezidenti kúni qarsańynda ashylady. Sol siiaqty, jańa jylǵa deiin Aqtóbe qalasynyń eki aýdanynan «Dina» saýda jelisin ashýdy josparlap otyrmyz. «Bolashaq» shaǵyn aýdany men Jańaqonys aýylynda jańa sýpermarketter iske qosylady», dedi ol sóz arasynda. Sonymen qatar, saýda oryndarynda eń tómengi zeinetaqy alatyn 4 myńǵa tarta zeinetkerge áleýmettik paketter taratylmaq.
Oblys ortalyǵyndaǵy «101-atqyshtar diviziiasy» kóshesi boiyndaǵy «Vanil» konditerlik dúkeniniń basshysy Záýresh Erkinalina qala turǵyndary úshin 1 qarasha men 16 jeltoqsan aralyǵynda «Vanil» ónimderi 10 paiyz jeńildikpen satylyp jatqanyn aitty. Qazir Aqtóbe qalasyndaǵy «Vanildiń» úsh dúkeninde ártúrli torttar men shokoladtan jasalǵan ónimderge 10 paiyz jeńildik qarastyrylǵan. Sol siiaqty, unnan jasalǵan ónimder búginde 25 paiyz jeńildikpen satylyp jatyr.
Táýelsizdikke arnalǵan aktsiiaǵa Aqtóbe qalasynyń «Batys-2» shaǵyn aýdanynda ornalasqan «Dostyq» sý sporty túrleri boiynsha oblystyq balalar men jasóspirimder sport mektebi de atsalysýda.
– Qazaqstan Respýblikasy Táýelsizdiginiń 25 jyldyǵyna orai 2016 jyldyń 1 qarashasynan 2017 jyldyń 1 qańtaryna deiin kúndizgi saǵat 12.00-14.00 aralyǵynda Uly Otan soǵysynyń ardagerlerine, múgedekterge, zeinetkerlerge basseinge, jattyǵý zalyna tegin kirý jáne stýdentterge, kóp balaly otbasylar úshin 50 paiyz jeńildik qarastyryldy. Aktsiia aiasynda qala turǵyndary úshin kúndizgi saǵat 12.00-den 14.00-ge deiin jáne keshki saǵat 18.00 men 21.00 aralyǵynda ortalyqta basseiinge kelip, jattyǵýlaryna bolady. Qalǵan ýaqyt balalarǵa arnalǵan. Sport kesheninde 15 jasqa deiingi balalarǵa osy qyzmet túrleri baǵasynyń 50 paiyzy ǵana alynady, – deidi sport mektebi direktorynyń orynbasary Lázzat Bekturlieva.
Qazir bul sport mektebine ártúrli toptaǵy 15 múgedek pen 50-ge tarta zeinetker turaqty kelip, jattyǵady. Mektepte júzý, sinhrondy júzý, sý doby toptary boiynsha 650-den astam bala jattyǵady.
Táýelsizdik kúni qarsańynda taýarlar men kórsetiletin qyzmetterge merekelik jeńildikter qoldanyp otyrǵan nysandardyń biri – «Batys-2» shaǵyn aýdanynda ornalasqan «Hammer» sport kesheni. Táýelsizdik merekesi qurmetine ardagerler men zeinetkerler úshin munda qyzmettiń qai túri de tegin kórsetiledi. Sport túrleri boiynsha edáýir jeńildikter qarastyrylǵan.
– Qarasha aiynan bastap sport súier qaýymǵa jeńildikter jasalyp otyr. Ásirese, jattyǵý zaly, bassein, taekvondo syndy ózge de sport túrleri úshin aiyna tólenetin qarajatqa jeńildikter qarastyryldy. Bul shara 16 jeltoqsanǵa deiin jalǵasady. Bir aita keterligi, Uly Otan soǵysy ardagerleri men zeinetkerlerge keste boiynsha aqysyz qyzmet kórsetemiz, dedi «Hammer» sport kesheniniń kreativtik menedjeri Temirlan Týlegýlov bizben áńgimesinde.
Merekelik aktsiiaǵa «Aqbóbek» kompaniiasy da qoldaý tanytyp, birqatar qyzmet túrlerine jeńildik baǵasyn usynyp otyr. «Aqbóbek» kompaniiasy bas direktorynyń orynbasary Shamshyraq Sailaǵieva Táýelsizdik kúnine orai kompaniiada barlyq qosymsha qyzmetterge 15 paiyz jeńildik jasalyp otyrǵanyn jetkizdi. Iaǵni, mundaǵy úiirmeler meditsinalyq, intellektýaldy, sporttyq jáne óner baǵyttaryna bólinedi. Qazir úiirmege 626 bala qatysady. Úiirmeniń baǵasy 4-15 myń teńge aralyǵynda. Aktsiiaǵa orai 1 qarasha men 31 jeltoqsan aralyǵynda barlyq úiirme baǵasyna 15 paiyz jeńildik jasalady. Eger ata-analar úiirme baǵasyn aldyn-ala tólep qoisa, onda artyq tólegen qarajaty qaitarylady.
Oblysta 2013 jyldan beri halyqqa meditsinalyq kómek kórsetip kele jatqan «Darý klinikasy» meditsinalyq ońaltý ortalyǵynda da aimaq turǵyndary úshin merekelik aktsiia uiymdastyrylýda. Klinikada keńes alý baǵasy – 3000 teńge. Jańa jylǵa deiin turǵyndar munda 15 paiyz jeńildikpen meditsinalyq qyzmet túrlerin ala alady.
– Elimizdiń Táýelsizdik alýynyń 25 jyldyq mereitoiyna orai klinikadaǵy barlyq mamannan keńes alý qyzmetiniń aqysy 15 paiyzǵa tómendetildi. Bul – eresekter úshin de, balalarǵa da kórsetilgen jeńildik. Búgingi kúni «Darý» klinikasynda bir kezeńde 200 adamǵa qyzmet kórsetiledi, – deidi «Darý» klinikasynyń bas dárigeri Izolda Kalandiia.
Onyń aitýynsha, zamanaýi, kóp baǵdarly klinikada eresekter men balalar úshin meditsinalyq tekseristiń barlyq túri qarastyrylǵan. Búginde diagnostika men emdeýdiń barlyq ádisteri, ońaltý túrleri halyqaralyq sapa standartyna sai júrgiziledi.
Mine, osylai aqtóbelik kásipkerlerdiń el Táýelsizdiginiń 25 jyldyǵyna orai kótergen baǵaly bastamasy áriptesteri tarapynan keń qoldaý tabýda. Merekelik márttik jasaýǵa yntaly kásipkerler qatary kún ótken saiyn kóbeie túsýde. Munyń ózi kásipkerlerdiń el Táýelsizdiginiń 25 jyldyǵyna tolymdy tartýy ǵana emes, áleýmettik jaýapkershilikti jete sezinýi deý oryndy bolmaq.
Satybaldy SÁÝIRBAI,
«Egemen Qazaqstan»
Aqtóbe oblysy
.jpeg)