Ázerbaijan Respýblikasynyń Qazaqstandaǵy Tótenshe jáne Ókiletti elshisi Rashad Mammadov Halyqaralyq Túrki akademiiasynyń arnaiy medalimen marapattaldy, dep habarlaidy QazAqparat tilshisi.
Túrki akademiiasynyń altyn medali elshiler arasynda alǵash ret berilip otyr.
«Ázerbaijannyń Qazaqstandaǵy elshisi Rashad Mammadov myrza osy ýaqyt aralyǵynda óte kóp jumys atqardy. Elshi bolyp taǵaiyndala salysymen, akademiiaǵa kelip, mýzeidi qurýǵa kómektesti. Óte kóp sharalardy birge ótkizdik, kóptegen kitaptar aýdaryldy. Biz Túrki akademiiasynyń arnaiy sheshimimen Rashid Mammadov myrzany osy bes jyldaǵy qyzmetine bailanysty akademiianyń arnaiy altyn medalimen marapattaǵymyz kelip otyr. Aita keterligi, elshiler arasynda bul altyn medal alǵash ret berilip otyr», - dedi Halyqaralyq Túrki akademiiasynyń prezidenti Darhan Qydyráli elordada Ázerbaijan týraly jańa kitaptardyń tusaýkeserinde.
Óz kezeginde Rashad Mammadov Túrki akademiiasynyń ortaq igilik bolyp sanalatynyn jetkizdi.
«Akademiia jyldar boiy tarihi, geografiialyq, ádebi jáne odan da basqa kitaptardy shyǵaryp, Ázerbaijandy baýyrlas halyqtarǵa, baýyrlas halyqtardy Ázerbaijanǵa tanyta aldy. Ortaq tarihymyz ben ortaq geografiiamyz jazyldy. Búgin de meni arnaiy altyn medalmen marapattaýdy uiǵarǵan eken, men atqarǵan, atqarýǵa tyrysqan jumystardyń barlyǵy – meniń qyzmettik mindettim. Túrki akademiiasyn damytý men halyqtarymyzdy jaqyndata túsý – bizdiń basty maqsatymyz bolýy kerek», - deidi Ázerbaijan elshisi.
Aita keteiik, Halyqaralyq Túrki akademiiasy Túrki Memleketteri Táýelsizdiginiń 30 jyldyǵy aiasynda «Qarabaq – Ázerbaijannyń jaýhary: tarihy, mádenieti, tabiǵaty», «Joǵalǵan baqyt: Qarabaqtyń shynaiy oqiǵalary» jáne «Ázerbaijan Halyq Respýblikasy» kitaptaryn shyǵardy.
Alqaly jiynǵa Halyqaralyq Túrki akademiiasynyń prezidenti Darhan Qydyráli, Ázerbaijan Respýblikasynyń Qazaqstandaǵy Tótenshe jáne Ókiletti elshisi Rashad Mammadov, Qyrǵyz Respýblikasynyń Qazaqstandaǵy Tótenshe jáne ókiletti elshisi Jeenbek Kýlýbaev, Ózbekstan Respýblikasynyń Qazaqstan Respýblikasyndaǵy Elshiliginiń Birinshi hatshysy Mýzaffar Ýsmanov, S.Seifýllin mýzeiiniń direktory Nesipbek Aituly, Ázerbaijan ulttyq májilisiniń mádeniet komitetiniń basshysy, qoǵam qairatkeri, jýrnalist Ganira Pashaeva jáne túrkiialyq jazýshy, Eýraziia jazýshylar odaǵynyń tóraǵasy Iakýp Ómeroǵly jáne basqa da memleket jáne qoǵam qairatkerleri, Qyrǵyzstan, Ózbekstan jazýshylary, ziialy qaýym ókilderi qatysty.
