Joǵary oqý oryndary ǵylym salasyndaǵy mindetterin durys atqarýy kerek. Bilim jáne ǵylym ministri Ashat Aimaǵambetov vedomstvonyń búgingi jalpy otyrysynda osylai dedi, dep habarlaidy "Ult aqparat".
«Memleket basshysy ǵylym salasyn damytý máselesin erekshe nazarda ustap otyrǵanyn jaqsy bilesizder. Ǵylymǵa qarjylandyrý jaǵynan da, basqa máseleler boiynsha da úlken kómek kórsetip otyr. Sondyqtan biz osy salany durys igerip, jolǵa qoiyp, jumysty ashyqtyq qaǵidasymen uiymdastyrýymyz kerek. Joǵary oqý oryndary da osy jumysqa belsendi túrde aralasýǵa tiis. Rektorlarǵa da jinalys kezinde aittym: ár fakýltette dekandardyń ǵylym jónindegi orynbasarlary bar. Kafedra da ǵylym boiynsha esebin tapsyrady. Ǵylym jónindegi prorektorlar da bar. Biraq osynyń bári bolǵannan keiin nátije de bolýy kerek qoi. Kommertsializatsiia keńselerin ashyp qoidyq. Biraq sonyń mazmuny qaida? Osy máselelerge erekshe nazar aýdaryp, joǵary oqý oryndary osy jumystardy belsendi túrde oryndaýǵa tiis», - dedi Ashat Aimaǵambetov Bilim jáne ǵylym ministrliginiń jalpy otyrysynda.
Ministrdiń aitýynsha, ǵylym salasyn tsifrlandyrý salasynda da máseleler joq emes.
«Biýrokratiialyq kedergilerdi joiý kerek. Basqarý júiesinde de ártúrli biýrokratiialyq kedergi kóp. Ony ózderińiz bilesizder. Biz birazyn joiyp, alyp tastadyq. Biraq dese de áli bar. Bizge keregi: ǵylymmen ainalysatyn áriptesterimizge tek óz jumysymen ainalysýǵa jaǵdai jasaý kerek. Ártúrli qaǵazbastylyq, esep berý degenderdiń ózi árine, úlken kedergi. Álbette, olardyń bárin biyl sheshkenimiz jón», - dedi ol.
Ministr sonymen qatar ǵylym komitetine kadr daiarlaý, zerthanalardy damytý máselelerine basa nazar aýdarýy kerektigin jetkizdi.
