Foto: Gov.kz
Búgin Májiliste «Tsifrlyq kodeks» jobasy talqylanyp, depýtat Ashat Aimaǵambetov úsh ózekti máseleni kóterdi, dep habarlaidy Ult.kz.
Depýtat eń aldymen tsifrlyq teńsizdik pen oflain qoljetimdilik problemasyna toqtaldy. Onyń sózinshe, internettiń joqtyǵy nemese tsifrlyq quraldardyń bolmaýy tek aýyl turǵyndaryna ǵana emes, egde jastaǵy jáne múmkindigi shekteýli azamattarǵa da qiyndyq týǵyzýda.
«Memlekettik qyzmetterdiń kóbi onlain kórsetiledi, biraq barlyǵynyń smartfon ne kompiýter paidalanýǵa múmkindigi joq. Sondyqtan áleýmettik osal toptarǵa oflain formatta qyzmet alýǵa jaǵdai jasalýy kerek», — dedi Aimaǵambetov.
Ekinshi kóterilgen taqyryp — balalardyń áleýmettik jelilerge erkin tirkelýi. Depýtattyń aitýynsha, qazir 5-6 jasar balalardyń TikTok pen Instagram-ǵa ata-anasynyń ruqsatynsyz tirkele alýy alańdatarlyq.
«Kei elderde tirkelý jasy 15-16 jas dep belgilengen. Al AQSh pen Ulybritaniiada ata-ananyń arnaiy ruqsaty qajet. Bizde bul baǵytta qandai sharalar qarastyrylyp jatyr?» — dedi depýtat.
Úshinshi másele — mektepterde smartfon qoldanýǵa tyiym salý. Aimaǵambetovtyń aitýynsha, Nazarbaev Ziiatkerlik mektepteri men keibir innovatsiialyq bilim ordalarynda bul tájiribe jaqsy nátije bergen.
«Telefonǵa tyiym oqý úlgerimin jaqsartyp, oqýshylar arasyndaǵy qarym-qatynasty nyǵaitty. Muny Tsifrlyq kodeks aiasynda qarastyrýǵa bola ma?» — dep surady ol.
Osy suraqtarǵa Jasandy intellekt jáne tsifrlyq damý vitse-ministri Dmitrii Mýn jaýap berdi. Onyń aitýynsha, jańa kodeks aiasynda alǵash ret «memlekettik tsifrlyq platforma» uǵymy engizilmek. Bul memlekettik organdar úshin biryńǵai standart pen arhitektýra qalyptastyrýǵa múmkindik beredi.
Mýnnyń sózinshe, qujatta áleýmettik osal toptar men múgedektigi bar adamdarǵa teń qoljetimdilik qaǵidattary qarastyrylǵan. Al balalardyń áleýmettik jelilerde tirkelýine qatysty ministrlik balalardyń damýy men onlain qaýipsizdigi arasyndaǵy tepe-teńdikti saqtaý qajettigin atap ótti.
Smartfonǵa tyiym salý máselesine kelsek, vitse-ministr mundai norma kodekste qarastyrylmaǵanyn aitty.
«Bizdiń ustanym — jastardy tehnologiiany shektemeý, kerisinshe ony tiimdi jáne qaýipsiz paidalanýǵa úiretý», — dedi ol.
