Soltústik Qazaqstan oblysynda byltyr 65 mln teńgege 4 nysanda qalpyna keltirý jumystary júrgizildi, dep habarlaidy "Ult aqparat".
SQO-da 600-ge jýyq tarihi-mádeni eskertkish bolsa, sonyń 8-iniń respýblikalyq mártebesi bar. Olardyń jaǵdaiy únemi mamandardyń baqylaýynda.
Byltyr tarihi-mádeni murany qorǵaý jáne paidalaný ortalyǵy Petropavldaǵy jáne Esil, Ýálihanov, Jambyl, Aiyrtaý aýdandarynda 16 eskertkishke monitoring jasady. Onyń qorytyndysy boiynsha, tarihi-mádeni nysandardyń ielerine jáne ony paidalanýshylarǵa anyqtalǵan olqylyqtardy joiýǵa 7 eskertý jiberilgen.
«Petropavl qalalyq ákimdigine qonys aýdarýshylar pýnktine jáne saiasi qýǵyn-súrgin qurbandaryna arnalǵan eskertkishke qatysty, bankterdiń biriniń filialyna kópes Shafeevtiń úiine bailanysty eskertýler boldy», - deidi SQO tarihi-mádeni murany qorǵaý jáne paidalaný ortalyǵynyń direktory Raqat Mambetalinov.
Byltyr óńirde 4 nysan biýdjet jáne ony paidalanýshylar esebinen jónge keltirildi. Osy maqsatqa 65 mln teńge jumsaldy. Qalpyna keltirilgen ǵimarattardyń biri – S.Muqanov turǵan úi. Jazýshynyń 120 jyldyq mereitoiyna orai Jambyl aýdany Sábit aýylyndaǵy murajaidyń ishi-syrty jóndelip, esik-terezeleri jańartyldy. Mańaiy da jónge keltirildi.
Biyl Aiyrtaý aýdanyndaǵy Aiǵanym qonysynda jóndeý jumystary jalǵaspaq. 1824 jyly salynǵan úi ótken ǵasyrdyń basynda órtengen.
Tek 1993 jyly qystaqtyń ornynda qaitadan ǵimarat boi kótergen edi. 2019 jyldan beri nysanda qalpyna keltirý jumystary júrgizilip jatyr. Biyl respýblika qazynasynan osy maqsatqa 25 mln teńge bólindi.
