17 qańtarda Tegeranda Irannyń joǵarǵy kósemi aiatolla Áli Hamenei juma namazynda jurt aldynda ýaǵyz oqyp, eldi tatýlyq pen birlikke shaqyrdy. Aiatolla bul ýaǵyzyn elde narazylyq kúsheiip turǵan tusta oqydy. Mosalla meshitindegi juma namazynda ol "Batys elderi irandyqtardy tizerlete almaidy" dedi.
Segiz jyldan keiin alǵash ret juma namazynda (2012 jyly aqpanda Iran islam revoliýtsiiasynyń 33 jyldyǵy tusynda juma namazynda ýaǵyz oqyǵan) málimdeme jasaǵan 80 jastaǵy Hamenei Tegeranda Iran zymyrandary tiip qulaǵan ýkrainalyq ushaqtyń apatyn "orny tolmas qasiret" dedi.
Ol "jaýlarymyz ýkrainalyq ushaqtyń apatyn Iranǵa, áskerimizge qarsy qoldanyp jatyr" dedi.
Ýaǵyzǵa myńdaǵan adam jinaldy. Meshit mańynda kúzet kúsheidi. El biligi juma namazynan keiin halyqty Iran áskerin qoldaityn sherýge shaqyrǵan.
3 qańtarda Irakta AQSh irandyq áskerbasy Kasem Súleimanidiń kózin joiǵan. 8 qańtarǵa aýǵan túni Iran "kek qaitarý" úshin Amerikanyń Iraktaǵy eki bazasyn zymyrandarmen atqylaǵan. Osy oqiǵadan birer saǵat ótkende Tegerannan Kievke ushyp shyqqan ýkrainalyq ushaq sanaýly minýttan soń Iran astanasy mańyna qulady. MAÝ kompaniiasynyń Boeing 737 ushaǵyndaǵy 176 adamnyń barlyǵy qaza boldy. Ushaqta alty eldiń azamaty bolǵan. Onyń ishinde kóbi – Iran azamaty. Odan keiin atalatyn Kanada azamattarynyń deni – Kanada azamattyǵyn alǵan irandyqtar.
Keiin Tegeran ýkrainalyq ushaqqa irandyq zymyran tigenin moiyndaǵan. Osydan soń elde bilikke qarsy narazylyq kúsheiip, jurt Hameneidiń bilikten ketýin talap etken.
