17 قاڭتاردا تەگەراندا يراننىڭ جوعارعى كٶسەمٸ اياتوللا ەلي حامەنەي جۇما نامازىندا جۇرت الدىندا ۋاعىز وقىپ, ەلدٸ تاتۋلىق پەن بٸرلٸككە شاقىردى. اياتوللا بۇل ۋاعىزىن ەلدە نارازىلىق كٷشەيٸپ تۇرعان تۇستا وقىدى. موساللا مەشٸتٸندەگٸ جۇما نامازىندا ول "باتىس ەلدەرٸ يراندىقتاردى تٸزەرلەتە المايدى" دەدٸ.
سەگٸز جىلدان كەيٸن العاش رەت جۇما نامازىندا (2012 جىلى اقپاندا يران يسلام رەۆوليۋتسيياسىنىڭ 33 جىلدىعى تۇسىندا جۇما نامازىندا ۋاعىز وقىعان) مەلٸمدەمە جاساعان 80 جاستاعى حامەنەي تەگەراندا يران زىمىراندارى تيٸپ قۇلاعان ۋكراينالىق ۇشاقتىڭ اپاتىن "ورنى تولماس قاسٸرەت" دەدٸ.
ول "جاۋلارىمىز ۋكراينالىق ۇشاقتىڭ اپاتىن يرانعا, ەسكەرٸمٸزگە قارسى قولدانىپ جاتىر" دەدٸ.
ۋاعىزعا مىڭداعان ادام جينالدى. مەشٸت ماڭىندا كٷزەت كٷشەيدٸ. ەل بيلٸگٸ جۇما نامازىنان كەيٸن حالىقتى يران ەسكەرٸن قولدايتىن شەرۋگە شاقىرعان.
3 قاڭتاردا يراكتا اقش يراندىق ەسكەرباسى كاسەم سٷلەيمانيدٸڭ كٶزٸن جويعان. 8 قاڭتارعا اۋعان تٷنٸ يران "كەك قايتارۋ" ٷشٸن امەريكانىڭ يراكتاعى ەكٸ بازاسىن زىمىراندارمەن اتقىلاعان. وسى وقيعادان بٸرەر ساعات ٶتكەندە تەگەراننان كيەۆكە ۇشىپ شىققان ۋكراينالىق ۇشاق ساناۋلى مينۋتتان سوڭ يران استاناسى ماڭىنا قۇلادى. ماۋ كومپانيياسىنىڭ Boeing 737 ۇشاعىنداعى 176 ادامنىڭ بارلىعى قازا بولدى. ۇشاقتا التى ەلدٸڭ ازاماتى بولعان. ونىڭ ٸشٸندە كٶبٸ – يران ازاماتى. ودان كەيٸن اتالاتىن كانادا ازاماتتارىنىڭ دەنٸ – كانادا ازاماتتىعىن العان يراندىقتار.
كەيٸن تەگەران ۋكراينالىق ۇشاققا يراندىق زىمىران تيگەنٸن مويىنداعان. وسىدان سوڭ ەلدە بيلٸككە قارسى نارازىلىق كٷشەيٸپ, جۇرت حامەنەيدٸڭ بيلٸكتەن كەتۋٸن تالاپ ەتكەن.
