Qyzylorda oblysy Jalaǵash aýdanyndaǵy tikushaq apatynan kóz jumǵan Ómirhan Qaýqabaevtyń aiaǵy aýyr kelinshegi jesir qaldy. 25 jastaǵy kelinshek jastan asqan ulyn qushaqtap, joqtaý aityp otyr. Marqumnyń týystary qaza bolǵan áskeri qyzmetkerdiń armandaryn aityp berdi, dep jazady KAZ.NUR.KZ portaly.
Qaza tapqan azamat keterinde uly men kelinshegimen qimai qoshtasypty. Tipti jumysqa osy joly aiaǵynyń tartpai turǵanyn da aitqan.
"Keterinde "Arsenimdi saǵynamyn. Ulymdy saǵynamyn-aý. Bul joly barýǵa aiaǵym tartpai tur. Bir ai issaparda bolamyn, ulymdy jaqsylap qara" dep ulymen qimai qoshtasyp edi.
Sol kúni tańǵy saǵat 4:30 ýaqytynda jumysqa uly ekeýmiz shyǵaryp saldyq. Bala basqa kezderi oianyp ketkende jylaityn. Sol kúni kúlip, oinap júrip ákesimen qoshtasyp edi.
Sońǵy kezde "erteń demalysqa shyqqanda ájemniń basyna baramyn" degendi jii aitatyn. Ketti ǵoi endi ájesiniń qasyna.
"Ájemniń basyna baryp quran oqytamyn" dep aityp júrdi", - deidi marqumnyń jubaiy Fariza Nazarbaeva.
25 jastaǵy kelinshek bir jarym jastaǵy balasymen jesir qaldy. Óziniń ekinshi sábiine aiaǵy aýyr. Áskeri qyzmetkerdiń anasy da kóz jasyn toqtata almai otyr.
"Balalarymnyń aldy edi. Áskerden kelgennen keiin "osy salany jaqsy kóremin" dep Aqtaýǵa jumysqa ketti. Ol jaqta úsh jyl jumys jasady. Kelisim-sharty bitkennen keiin balama "qasyma kel" dep aitqan bolatynmyn.
"Mama, osy jumys unaidy, júre bereiinshi" degen soń "óziń bil" degen edim.
Úlken otbasy bolýdy armandaityn. Mezgilsiz qaza. Qaiteiin júregim qan jylaidy. Maǵan osy issaparǵa shyǵar aldynda keshkilik habarlasty.
Balam barǵan soń "habarlas, amandyǵyńdy bileiin" degen edim. Qaraly habar aldym-aý", - deidi anasy Qarlyǵash Iýsýpova.
Aita keteiik, Ómirhan Qaýqabaevtyń otbasy Qaraqalpaqstannan kóship kelgen. Marqum úsh aǵaiyndy bolǵan.
"Ol jumysyn qatty jaqsy kórdi. Áskeri forma kiiýdi bala kezinen armandady. Áskerden kelgennen keiin aýylda qalýyn suraǵanymyzben, elge qyzmet kórsetýdi tańdady", - deidi aǵasy Ádil Kaýkenov.
Qaraly habar jetken otbasyǵa kóńil aitýshylar jan-jaqtan aǵylyp jatyr.
"Jerlesimizdiń otbasyna qaiǵyra kóńil aitamyz. Barlyq jerleý sharasynyń shyǵynyn kóteretin bolamyz. Marqumnyń denesin búgin jetkizedi dep kútip otyrmyz", - deidi Mártók aýdanynyń ákimi Jandos Baiyrhanov.
Eske sala ketsek, 27 naýryzda Qyzylorda oblysy, Jalaǵash aýdanynda bortynda 13 adam bar tikushaqtyń apatqa ushyrǵany habarlandy.
Qorǵanys ministrliginiń habarlaýynsha, atalmysh tikushaq 4 birdei áskeri tikushaq quramynan turatyn bólimmen birge Aqtaý qalasynan Shymkentke ushyp bara jatqan.
Oqiǵaǵa qatysty pikir bildirgen memleket basshysy Qasym-Jomart Toqaev ekipaj músheleriniń qaza bolǵanyn jetkizip, olardyń jaqyndaryna kóńil aitty.
28 naýryzda Qorǵanys ministrligi málimdeme jasap, borttaǵy 13 adamnyń barlyǵy qaza bolǵanyn habarlady.
